Monday, February 19, 2018

ਸੀ.ਪੀ.ਆਈ. ਉਮੀਦਵਾਰਾਂ ਦੀ ਮੁਹਿੰਮ ਜੋਰਾਂ ਤੇ

Mon, Feb 19, 2018 at 3:24 PM
ਲੜੀਆਂ ਜਾ ਰਹੀਆਂ ਸਾਰੀਆਂ ਸੀਟਾਂ ਵਿੱਚ ਸਖਤ ਟੱਕਰ ਦੇ ਰਹੇ ਹਾਂ
ਲੁਧਿਆਣਾ: 19 ਫਰਵਰੀ 2018: (ਪੰਜਾਬ ਸਕਰੀਨ ਬਿਊਰੋ)::
ਵਾਰਡ ਨੰ .78 ਤੋਂ ਸੀ.ਪੀ.ਆਈ. ਉਮੀਦਵਾਰ  ਕਾਮਰੇਡ ਰਣਧੀਰ ਸਿੰਘ ਧੀਰਾ, ਵਾਰਡ ਨੰ. 95 ਤੋਂ ਕਾਮਰੇਡ ਜੀਤ ਚੌਰਾਸੀਆ ਅਤੇ ਵਾਰਡ ਨੰ. 94 ਤੋਂ ਕਾ: ਸੰਜੇ ਕੁਮਾਰ ਸਾਰੇ ਤਿੰਨ ਸੀਟਾਂ ਤੇ ਸਖਤ ਟੱਕਰ ਦੇ ਰਹੇ ਹਨ।  ਇਸ ਤੋਂ ਇਲਾਵਾ ਪਾਰਟੀ ਦੀ ਹਮਾਇਤ ਪ੍ਰਾਪਤ ਅਜਾਦ ਉੱਮੀਦਵਾਰ ਕੁਲਵੰਤ ਕੌਰ ਵਾਰਡ ਨੰ 7 ਤੋਂ ਮੂਹਰੇ ਹਨ ਅਤੇ ਵਾਰਡ ਨੰ 22 ਤੋਂ ਰਾਜਵਿੰਦਰ ਕੌਰ ਜਿਨ੍ਹਾਂ ਕੋਲ ਸੀ.ਪੀ.ਆਈ. ਦੀ ਹਮਾਇਤ ਹੈ  ਆਜਾਦ ਉਮੀਦਵਾਰ ਵਜੋਂ ਚੋਣ ਲੜ ਰਹੇ ਹਨ, ਪੂਰੀ ਤਰਾਂ ਦੌੜ ਵਿੱਚ ਹਨ।  ਉਨ੍ਹਾਂ ਦੇੇ ਪ੍ਰਚਾਰ ਦੀ ਕਾਰਜ ਪ੍ਰਣਾਲੀ ਘਰ ਘਰ ਜਾਕੇ ਲੋਕਾਂ ਨੂੰ ਮਿਲਣਾ,  ਅਤੇ ਨੁੱਕੜ ਮੀਟਿੰਗਾਂ ਕਰਨਾ ਹੈ।  ਔਰਤਾਂ ਸਾਰੀਆਂ ਪੰਜ ਸੀਟਾਂ ‘ਤੇ ਮੁਹਿੰਮ ਵਿਚ ਸਰਗਰਮੀ ਨਾਲ ਹਿੱਸਾ ਲੈ ਰਹੀਆਂ ਹਨ।  ਪਾਰਟੀ ਵਲੋਂ ਜਾਰੀ ਚੋਣ ਘੋਸਣਾ ਪੱਤਰ ਵਿੱਚ ਨਗਰ ਦੀਆਂ ਸਮਾਂ ਵਿਹਾ ਚੁੱਕੀਆਂ ਪੀਣ ਵਾਲੇ ਪਾਣੀ ਦੀਆਂ ਪਾਈਪਾਂ ਬਦਲਣਾ ਤੇ ਸਾਫ ਪਾਣੀ ਯਕੀਨੀ ਬਣਾਉਣਾ, ਹਰ ਵਾਰਡ ਵਿਚ ਸਰਕਾਰੀ ਡਿਸਪੈਂਸਰੀਆਂ, ਹਰੇਕ ਵਾਰਡ ਵਿਚ ਘੱਟ ਕੀਮਤ ਵਾਲੀਆਂ  ਦਵਾਈਆਂ ਦੀਆਂ ਦੁਕਾਨਾਂ, ਹਰੇਕ ਨਾਗਰਿਕ ਲਈ ਸਸਤੀ ਗੁਣਵੱਤਕ ਸਿੱਖਿਆ, ਕਿਫਾਇਤੀ ਰਿਹਾਇਸੀ ਸਹੂਲਤਾਂ, ਆਰਥਿਕ ਤੌਰ ਤੇ ਕਮਜੋਰ ਵਰਗਾਂ ਲਈ ਸਸਤੇ ਘਰ, ਹਰ ਇੱਕ ਵਾੱਚ ਵਿਚ ਖੇਡ ਸੁਵਿਧਾਵਾਂ ਅਤੇ ਖੇਡ ਦਾ ਮੈਦਾਨ, ਹਰ ਮੁਹੱਲੇ ਵਿਚ ਪਾਰਕ, ਯੋਜਨਾਬੱਧ ਰਿਹਾਇਸੀ ਕਾਲੋਨੀਆਂ, ਚੰਗੀਆਂ ਸੜਕਾਂ ਸਟ੍ਰੀਟ ਲਾਈਟਾਂ ਅਤੇ ਅਤੇ ਟਰੈਫਿਕ ਲਾਈਟਾਂ ਦੇ ਲਈ  ਸੋਲਰ ਪੈਨਲ ਅਤੇ ਇਹਨਾ ਦਾ ਸਹੀ ਰੱਖ ਰਖਾਓ, ਆਈ ਐੱਸ ਬੀ ਐੱ ਟੀ ਦੇ ਬਾਹਰ ਤੋਂ ਸੁਰੂ ਕਰਕੇ ਨਗਰ ਦੇ ਭੀੜ ਵਾਲੇ ਇਲਾਕਿਆਂ ਵਿੱਚ ਸੜਕ ਪਾਰ ਕਰਨ ਦੇ ਲਈ ਪੁਲ, ਸਾਰੇ ਰੇਲਵੇ ਫਾਟਕਾਂ ਊੱਤੇ ਫਲਾਈਓਵਰ, ਮੁੱਖ ਹਸਪਤਾਲਾਂ ਲਈ ਸੌਖੀ ਪਹੁੰਚ ਲਈ ਫਲਾਈ ਓਵਰ, ਸਤਲੁਜ ਐਕਸਨ ਪਲਾਨ ਤਹਿਤ ਬੁੱਢੇ ਨਾਲੇ ਦੀ ਸਫਾਈ, ਵਿਗੜ ਰਹੀ ਅਮਨ ਕਾਨੂੰਨ ਦੀ ਵਿਵਸਥਾ ਵਿੱਚ ਸੁਧਾਰ ਅਤੇ ਖਾਸ ਤੌਰ ‘ਤੇ ਲੜਕੀਆਂ ਅਤੇ ਮਹਿਲਾ ਕਰਮੀਆਂ ਦੇ ਲਈ ਸੁਰੱਖਿਅਤ ਵਾਤਾਵਰਨ, ਕੰਮਕਾਜੀ  ਔਰਤਾਂ ਦੇ ਲਈ ਹੋਸਟਲ, ਰੇਤ ਮਾਫੀਆ, ਲੈਂਡ ਮਾਫੀਆ, ਕੇਬਲ ਮਾਫੀਆ ਅਤੇ ਪਾਰਕਿੰਗ ਮਾਫੀਆ ਦਾ ਖਾਤਮਾ, ਛੋਟੇ ਉਦਯੋਗਾਂ ਲਈ ਅਲੱਗ ਫੋਕਲ ਪੁਆਇੰਟ, ਵਪਾਰੀਆਂ ਅਤੇ ਉੱਦਮੀਆਂ ਦੀ ਸੁਰੱਖਿਆ, ਆਟੋ ਰਿਕਸ਼ਾ ਨੂੰ ਸੁਚਾਰੂ ਕਰਨਾ, ਰੇਹੜੀ ਫੜੀਆਂ ਵਾਲਿਆਂ ਲਈ ਵੈਂਡਿੰਗ ਜ਼ੋਨ  ਬਣਾਉਣੇ, ਨਗਰ ਨਿਗਮ ਦੇ ਕੰਮਾਂ ਵਿੱਚ ਪਾਰਦਰਸ਼ਿਤਾ ਲਿਆਉਣੀ ਤੇ ਇਸ ਲਈ ਨਗਰ ਨਿਗਮ ਦੀਆਂ ਕਾਰਵਾਈਆਂ ਨੂੰ ਡਿਜਿਟਲ ਕਰਕੇ ਇਸਦੀ ਵੈਬਸਾਈਟ ਤੇ ਪਾਉਣਾ, ਅਵਾਰਾ ਪਸੂਆਂ ਦੀ ਸਾਂਭ ਸੰਭਾਲ ਆਦਿ।

Saturday, February 17, 2018

ਮੀਡੀਆ ਅਤੇ ਪਾਠਕ ਦੇ ਰਿਸ਼ਤੇ ਵਿੱਚ ਵੱਧ ਰਿਹਾ ਹੈ ਫਾਸਲਾ: ਹਰਤੋਸ਼ ਬੱਲ

ਬੂਟਾ ਸਿੰਘ ਅਤੇ ਮਹਿੰਦਰ ਸਿੰਘ ਮਾਨੂੰਪੁਰੀ ਨੂੰ ਮਿਲਿਆ ਸੂਹੀ ਸਵੇਰ ਮੀਡੀਆ ਐਵਾਰਡ
ਲੁਧਿਆਣਾ: 17 ਫਰਵਰੀ 2018: (ਪੰਜਾਬ ਸਕਰੀਨ ਟੀਮ):: Clicks here for more pics on Facebook
ਅਦਾਰਾ "ਸੂਹੀ ਸਵੇਰ ਮੀਡੀਆ" ਵੱਲੋਂ ਆਪਣੇ ਪੁਨਰ ਆਗਮਣ ਦੀ 6ਵੀਂ ਵਰ੍ਹੇਗੰਢ ਮੌਕੇ ਸਲਾਨਾ ਸਮਾਗਮ ਦਾ ਆਯੋਜਨ ਪੰਜਾਬੀ ਭਵਨ ਵਿਖੇ ਕੀਤਾ ਗਿਆ। ਇਸ ਸਮਾਗਮ ਵਿੱਚ ਅਦਾਰੇ ਵੱਲੋਂ ਇਸ ਸਾਲ ਦਾ ਸੂਹੀ ਸਵੇਰ ਐਵਾਰਡ ਬੂਟਾ ਸਿੰਘ ਅਤੇ ਮਹਿੰਦਰ ਸਿੰਘ ਮਾਨੂੰਪੁਰੀ ਨੂੰ ਪ੍ਰਦਾਨ ਕੀਤਾ ਗਿਆ। ਸਮਾਗਮ ਵਿੱਚ "ਮੀਡੀਆ ਵਿਜਲ" ਦੇ ਸੰਪਾਦਕ ਪੰਕਜ ਸ੍ਰੀਵਾਸਤਵ ਅਤੇ "ਦ ਕਾਰਵਾਂ" ਮੈਗਜ਼ੀਨ ਦੇ ਰਾਜਨੀਤਕ ਸੰਪਾਦਕ ਹਰਤੋਸ਼ ਬੱਲ ਨੇ ਵਿਸ਼ੇਸ਼ ਤੌਰ ਤੇ ਸ਼ਿਰਕਤ ਕੀਤੀ।
"ਦ ਕਾਰਵਾਂ" ਮੈਗਜ਼ੀਨ ਦੇ ਰਾਜਨੀਤਕ ਸੰਪਾਦਕ ਹਰਤੋਸ਼ ਬੱਲ ਨੇ ਕਿਹਾ ਕਿ ਮੀਡੀਆ ਇੱਕ ਉਦਯੋਗ ਦਾ ਰੂਪ ਧਾਰ ਚੁੱਕਾ ਹੈਇਸ ਉਦਯੋਗ ਵਿੱਚ ਵਿੱਚ ਜੋ ਕੰਮ ਜ਼ਿਆਦਾਤਰ ਮੀਡੀਆ ਦੇ ਮਾਲਕ ਦਾ ਹੈ ੳੇਹੀ ਕੰਮ ਵੱਡੇ ਐਡਵਰਟਾਈਜ਼ਰ ਦਾ ਹੁੰਦਾ ਹੈ। ਅਜਿਹੇ ਮਾਹੌਲ ਵਿੱਚ ਇਹ ਪੱਤਰਕਾਰ ਨਹੀਂ ਸਗੋਂ ਮੈਨੇਜਰ ਹਨਜਿਸ ਕਾਰਨ ਮੀਡੀਆ ਅਤੇ ਪਾਠਕ ਦੇ ਰਿਸ਼ਤੇ ਦਰਮਿਆਨ ਫਾਸਲਾ ਵੱਧ ਰਿਹਾ ਹੈ।

ਮੀਡੀਆ ਵਿਜਲ’ ਦੇ ਸੰਪਾਦਕ ਪੰਕਜ ਸ੍ਰੀਵਾਸਤਵ ਨੇ ਵਰਤਮਾਨ ਦੌਰ ਵਿੱਚ ਮੀਡੀਆ ਦੀ ਆਜ਼ਾਦੀ ਅਤੇ ਜਵਾਬਦੇਹੀ ਵਿਸ਼ੇ ਤੇ ਆਪਣੇ ਵਿਚਾਰ ਪੇਸ਼ ਕਰਦਿਆਂ ਕਿਹਾ ਕਿ ਅਜਿਹੇ ਪੱਤਰਕਾਰ ਬਹੁਤ ਘੱਟ ਰਹਿ ਗਏ ਹਨ ਜੋ ਸੁਤੰਤਰ ਰਹਿ ਕੇ ਲੋਕਪੱਖੀ ਮੁੱਦਿਆਂ ਨੂੰ ਉਭਾਰਦੇ ਹਨ ਅਤੇ ਸੱਚ ਦਾ ਸਾਥ ਦਿੰਦੇ ਹਨ। ਉਨ੍ਹਾਂ ਕਿਹਾ ਕਿ ਅਜੋਕਾ ਸਮਾਂ ਪੱਤਰਕਾਰੀ ਦੀ ਆਜ਼ਾਦੀ ਲਈ ਚੁਣੌਤੀ ਭਰਪੂਰ ਸਮਾਂ ਹੈਜਿਸ ਵਿੱਚ ਵਿਕਲਪਿਕ ਮੀਡੀਆ ਬਾਰੇ ਸੋਚਣਾ ਪਵੇਗਾ ਅਤੇ ਇਸ ਵਿੱਚ ਦੇਸ਼ ਦੇ ਲੋਕਾਂ ਨੂੰ ਸਾਥ ਦੇਣਾ ਬਹੁਤ ਲਾਜ਼ਮੀ ਹੈ।ਉਨ੍ਹਾਂ ਕਿਹਾ ਕਿ ਪੱਤਰਕਾਰ ਲਈ ਸੱਚ ਅਤੇ ਤੱਥ ਪ੍ਰਮੁੱਖ ਹੋਣੇ ਚਾਹੀਦੇ ਹਨ।
ਸੂਹੀ ਸਵੇਰ ਦੇ ਮੁੱਖ ਸੰਪਾਦਕ ਸ਼ਿਵ ਇੰਦਰ ਸਿੰਘ ਨੇ ਕਿਹਾ ਕਿ ਸੂਹੀ ਸਵੇਰ ਲੋਕਧਾਰਾ ਦਾ ਮੀਡੀਆ ਹੈ ਜੋ ਲੋਕਾਂ ਦੀ ਮਦਦ ਨਾਲ ਚਲਾਇਆ ਜਾ ਰਿਹਾ ਹੈ। ਉਨ੍ਹਾਂ ਦੱਸਿਆ ਕਿ ਗੁਰਮੁਖੀ ਅਤੇ ਸ਼ਾਹਮੁਖੀ ਲਿਪੀ ਵਿੱਚ ਜਿੱਥੇ ਆਨਲਾਈਨ ਸੂਹੀ ਸਵੇਰ ਵੈੱਬਸਾਈਟ ਚੱਲ ਰਹੀ ਹੈ ਉੱਥੇ ਯੂ-ਟਿਊਬ ਚੈਨਲ ਵੀ ਚਲਾਇਆ ਜਾ ਰਿਹਾ ਹੈ ਜਿੱਥੇ ਪਾਠਕਾਂ ਨੂੰ ਚਲੰਤ ਮੁੱਦਿਆਂ ਅਤੇ ਸਾਹਿਤ ਤੇ ਰਾਜਨਿਤਕ ਖੇਤਰ ਦੀਆਂ ਹਸਤੀਆਂ ਨਾਲ ਮੁਲਾਕਾਤਾਂ ਦੇ ਪ੍ਰੋਗਰਾਮ ਪੇਸ਼ ਕੀਤੇ ਜਾਂਦੇ ਹਨ। ਉਹਨਾਂ "ਸੂਹੀ ਸਵੇਰ" ਐਵਾਰਡ ਪ੍ਰਾਪਤ ਕਰ ਰਹੀਆਂ ਸ਼ਖ਼ਸੀਅਤਾਂ ਬਾਰੇ ਦੱਸਦਿਆਂ ਕਿਹਾ ਕਿ ਬੂਟਾ ਸਿੰਘ ਨੇ ਜਮਹੂਰੀ ਮੁੱਦਿਆਂ ਨੂੰ ਆਪਣੀ ਕਲਮ ਰਾਹੀਂ ਜਨ-ਸਾਧਾਰਨ ਤੱਕ ਪਹੁੰਚਾਉਣਪੰਜਾਬੀ ਜ਼ੁਬਾਨ ਵਿੱਚ ਸਿਆਸੀ ਚੇਤਨਾ ਵਾਲਾ ਸਾਹਿਤ ਰਚਨ ਅਤੇ ਅਨੁਵਾਦ ਕਰਨ ਵਿੱਚ ਵਡਮੁੱਲਾ ਯੋਗਦਾਨ ਪਾਇਆ ਹੈ। ਓਪਰੇਸ਼ਨ ਗਰੀਨ ਹੰਟ,ਦਲਿਤਾਂਘੱਟ ਗਿਣਤੀਆਂ ਅਤੇ ਹੋਰ ਦੱਬੇ-ਕੁਚਲੇ ਵਰਗ ਦੇ ਲੋਕਾਂ ਦੇ ਮੁੱਦਿਆਂ ਨੂੰ ਪੰਜਾਬੀ ਪਾਠਕਾਂ ਵਿੱਚ ਲੈ ਕੇ ਗਏ ਹਨ। ਉਹਨਾਂ ਦੱਸਿਆ ਕਿ ਦੂਜਾ "ਸੂਹੀ ਸਵੇਰ ਮੀਡੀਆ ਐਵਾਰਡ ਮਹਿੰਦਰ ਸਿੰਘ ਮਾਨੂੰਪੁਰੀ ਨੂੰ ਦਿੱਤਾ ਜਾ ਰਿਹਾ ਹੈ, ਜਿਹਨਾਂ ਨੂੰ ਫ਼ਨਬਸਪ;ਜੇਕਰ ਪੰਜਾਬੀ ਦਾ ਇਨਸਾਈਕਲੋਪੀਡੀਆ ਆਖਿਆ ਜਾਵੇ ਤਾਂ ਕੋਈ ਅਤਿਕਥਨੀ ਨਹੀਂ ਹੋਵੇਗੀ।ਮਾਨੂੰਪੁਰੀ ਨੇ ਜਿੱਥੇ ਉਨ੍ਹਾਂ ਨੇ ਬਾਲਾਂ ਲਈ ਸਿਹਤਮੰਦ ਸਾਹਿਤ ਰਚਿਆ ਹੈ ਉੱਥੇ ਆਮ ਲੋਕਾਂ ਚ ਸਾਹਿਤ ਦੀ ਮੱਸ ਲਗਾਉਣ ਵਿੱਚ ਵਡਮੁੱਲਾ ਯੋਗਦਾਨ ਪਾਇਆ ਹੈ। ਉਹ ਲੋਕਾਂ ਤੱਕ (ਖ਼ਾਸ ਕਰ ਬੱਚਿਆਂ ਵਿੱਚ) ਮਿਆਰੀ ਸਾਹਿਤ ਪਹੁੰਚਾਉਣ ਲਈ ਉਹ ਇੱਕ ਕਾਰਕੁੰਨ ਦੀ ਤਰਾਂ ਭੂਮਿਕਾ ਨਿਭਾਉਂਦੇ ਰਹੇ ਹਨ। ਵਿਚਾਰ ਚਰਚਾ ਵਿੱਚ ਸੁਕੀਰਤਰਾਜੀਵ ਖੰਨਾ, "ਮੀਡੀਆ ਵਿਜਲ" ਦੇ ਸਹਾਇਕ ਸੰਪਾਦਕ ਅਭਿਸ਼ੇਕ ਸ੍ਰੀਵਾਸਤਵਡਾ. ਸੁਰਜੀਤਮਿੱਤਰ ਸੈਨ ਮੀਤਗੁਲਜ਼ਾਰ ਪੰਧੇਰ,ਪਰਮਜੀਤ ਮਹਿਕਅਵਤਾਰ ਸਿੰਘਅਮਨਿੰਦਰ ਪਾਲ ਸ਼ਰਮਾ ਨੇ ਭਾਗ ਲਿਆ।

Friday, February 16, 2018

ਜ਼ਿਲ੍ਹਾ ਫਿਰੋਜ਼ਪੁਰ ਅਤੇ ਫ਼ਾਜ਼ਿਲਕਾ ਦੇ ਕਹਾਣੀ ਲੇਖਕਾਂ ਦਾ ਕਹਾਣੀ ਦਰਬਾਰ

ਪੰਜਾਬ ਸਾਹਿਤ ਅਕੈਡਮੀ ਚੰਡੀਗੜ੍ਹ ਵੱਲੋਂ ਵਿਸ਼ੇਸ਼ ਆਯੋਜਨ
ਦੇਵ ਸਮਾਜ ਕਾਲਜ ਫਾਰ ਵੁਮੈਨ ਦੇ ਵਿਹੜੇ ਵਿੱਚ ਯਾਦਗਾਰੀ ਸਮਾਗਮ
ਫਿਰੋਜ਼ਪੁਰ: 15 ਫਰਵਰੀ 2018: (ਪੰਜਾਬ ਸਕਰੀਨ ਬਿਊਰੋ)::
ਅਕੈਡਮੀ ਦੀਆਂ ਸਾਹਿਤਕ ਸਰਗਰਮੀਆਂ ਨੂੰ ਚੰਡੀਗੜ੍ਹ ਦੀ ਵਲਗਣ ਚੋਂ ਬਾਹਰ ਕੱਢ ਕੇ ਛੋਟੇ ਸ਼ਹਿਰਾਂ ਤੱਕ ਲੈ ਕੇ ਜਾਣ ਦੇ ਯਤਨਾਂ ਦੀ ਕੜੀ ਵਜੋਂ ਕਰਵਾਏ ਗਏ ਇਸ ਸਮਾਗਮ ਵਿੱਚ  ਕਾਲਜ ਦੇ ਪ੍ਰਿੰਸੀਪਲ ਅਤੇ ਨਾਮਵਰ ਵਿੱਦਿਆ ਵੇਤਾ ਡਾ ਮਧੂ ਪ੍ਰਾਸ਼ਰ ਮੁੱਖ ਮਹਿਮਾਨ ਵਜੋਂ ਸ਼ਾਮਲ ਹੋਏ ਅਤੇ ਪ੍ਰਧਾਨਗੀ  ਉੱਘੇ ਚਿੰਤਕ ਡਾ਼ ਜਗਵਿੰਦਰ ਜੋਧਾ ਨੇ ਕੀਤੀ ਜਦੋਂ ਕਿ ਚਰਚਿਤ ਸ਼ਾਇਰ ਹਰਮੀਤ ਵਿਦਿਆਰਥੀ ਅਤੇ ਸਮਾਗਮ ਦੇ ਕਨਵੀਨਰ ਬਲਵੰਤ ਭਾਟੀਆ ਪ੍ਰਧਾਨਗੀ ਮੰਡਲ ਵਿੱਚ ਸ਼ਾਮਲ ਸਨ । ਲੈਕਚਰਾਰ ਪਰਮ ਗੋਦਾਰਾ ਨੇ ਆਏ ਮਹਿਮਾਨਾਂ ਨੂੰ ਜੀਅ ਆਇਆਂ ਨੂੰ ਕਿਹਾ । ਹਰਮੀਤ ਵਿਦਿਆਰਥੀ ਨੇ ਅਕੈਡਮੀ ਦੀਆਂ ਪਹਿਲ ਕਦਮੀਆਂ ਦਾ ਸਵਾਗਤ ਕਰਦਿਆਂ ਸਾਹਿਤਕ ਸੰਸਥਾਵਾਂ ਦੇ ਲੋਕਾਂ ਵੱਲ ਮੁਹਾੜ ਨੂੰ ਸ਼ੁੱਭ ਸਗਨ  ਕਿਹਾ । ਬਲਵੰਤ ਭਾਟੀਆ ਨੇ ਅਕੈਡਮੀ ਦੀਆਂ ਭਵਿੱਖੀ ਸਰਗਰਮੀਆਂ ਦੀ ਜਾਣਕਾਰੀ ਦਿੰਦਿਆਂ ਕਾਲਜ ਵੱਲੋਂ ਮਿਲੇ ਸਹਿਯੋਗ ਲਈ ਕਾਲਜ ਪ੍ਰਬੰਧਕ ਕਮੇਟੀ ਦਾ ਧੰਨਵਾਦ ਕੀਤਾ। ਪ੍ਰਿੰਸੀਪਲ ਮਧੂ ਪ੍ਰਾਸ਼ਰ ਨੇ ਵੀ ਅਕੈਡਮੀ ਦੀ ਭਰਵੀਂ ਸ਼ਲਾਘਾ ਕੀਤੀ।
ਉਮ ਪ੍ਰਕਾਸ਼ ਸਰੋਏ ਦੀ ਮੰਚ ਸੰਚਾਲਨਾ ਅਧੀਨ ਗੁਰਦਿਆਲ ਸਿੰਘ ਵਿਰਕ ਨੇ " ਪੁਨਰ ਪ੍ਰਵਾਜ਼" ਕਹਾਣੀ ਦਾ ਪਾਠ ਕਰਕੇ ਕਹਾਣੀ ਦਰਬਾਰ ਦਾ ਆਰੰਭ ਕੀਤਾ।ਐਮ.ਕੇ. ਰਾਹੀ ਨੇ ਕਹਾਣੀ " ਦੇਸ਼ ਪਹਿਲਾਂ " ਅਤੇ ਫ਼ਾਜ਼ਿਲਕਾ ਤੋਂ ਆਏ ਕਹਾਣੀਕਾਰ ਗੁਰਮੀਤ ਸਿੰਘ ਨੇ " ਲੇਖਾ ਮੰਗੇ ਬਾਣੀਆਂ" ਕਹਾਣੀਆਂ ਪੇਸ਼ ਕਰਕੇ ਭ੍ਰਿਸ਼ਟਾਚਾਰ ਦੇ ਵਿਭਿੰਨ ਪੱਖਾਂ ਨੂੰ ਉਜਾਗਰ ਕੀਤਾ।ਦਵਿੰਦਰ ਸਿੰਘ ਸੰਧੂ ਨੇ ਕਾਰਗਿਲ ਜੰਗ ਦੇ ਪਿਛੋਕੜ ਵਾਲੀ ਕਹਾਣੀ  " ਵਤਨ ਦਾ ਸ਼ਹੀਦ " ਪੜੀ । ਅਬੋਹਰ ਤੋਂ ਆਏ ਕਹਾਣੀਕਾਰ ਸੁਖਰਾਜ ਧਾਲੀਵਾਲ ਨੇ ਪ੍ਰਤੀਕਾਤਮਿਕ ਕਹਾਣੀ " ਤੋਤੇ " ਪੇਸ਼ ਕੀਤੀ। ਦੀਪਤੀ ਬਬੂਟਾ ਨੇ ਹਿੰਦ ਪਾਕ ਰਿਸ਼ਤਿਆਂ ਦੇ ਵੱਖ ਵੱਖ ਪੱਖਾਂ ਨੂੰ ਚਿਤਰਦੀ ਕਹਾਣੀ "ਨਜ਼ਰਾਂ ਤੋਂ ਦੂਰ ਨਹੀਂ " ਪੇਸ਼ ਕਰਕੇ ਮਾਹੌਲ ਨੂੰ ਭਾਵੁਕ ਕਰ ਦਿੱਤਾ।
ਪੜ੍ਹੀਆਂ ਗਈਆਂ ਕਹਾਣੀਆਂ ਬਾਰੇ ਗੱਲ ਕਰਦਿਆਂ ਡਾ਼ ਜਗਵਿੰਦਰ ਜੋਧਾ ਨੇ ਪੂਰਨ ਬੇਬਾਕੀ ਨਾਲ ਵਿਸ਼ਲੇਸ਼ਣ ਕੀਤਾ।ਕਹਾਣੀਆਂ ਦੇ ਉਸਾਰੂ ਪੱਖ ਦੀ ਪ੍ਰਸੰਸਾ ਕਰਦਿਆਂ ਡਾ਼ ਜੋਧਾ ਕਮਜ਼ੋਰੀਆਂ ਉਪਰ ਵੀ ਉਂਗਲ ਧਰੀ। ਡਾ ਬਲਵਿੰਦਰ ਕੌਰ ਨੇ ਆਏ ਮਹਿਮਾਨਾਂ ਅਤੇ ਅਕੈਡਮੀ ਦਾ ਧੰਨਵਾਦ ਕੀਤਾ। ਇਸ ਸਮਾਗਮ ਦੀ ਸਫਲਤਾ ਲਈ ਅਨਿਲ ਆਦਮ,ਰਾਜੀਵ ਖਯਾਲ,ਸ਼ਿਵ ਸੇਠੀ ਅਤੇ ਪ੍ਰਤੀਕ ਪਰਾਸ਼ਰ ਦਾ ਵਿਸ਼ੇਸ਼ ਯੋਗਦਾਨ ਸੀ।ਪ੍ਰੋ਼ ਕੁਲਦੀਪ, ਮਲਕੀਤ ਕੰਬੋਜ, ਲਾਲ ਸਿੰਘ ਸੁਲਹਾਣੀ,ਮੁਰੀਦ ਸੰਧੂ, ਰਮਨ ਤੂਰ,ਹਰਚਰਨ ਚੋਹਲਾ,ਬਲਵਿੰਦਰ ਪਨੇਸਰ, ਹਰਦੀਪ ਗੋਸਲ ਸਮੇਤ ਬਹੁਤ ਸਾਰੇ ਲੇਖਕਾਂ ਸਾਹਿਤ ਪ੍ਰੇਮੀਆਂ ਅਤੇ ਵਿਦਿਆਰਥੀਆਂ ਨੇ ਸਮਾਗਮ ਨੂੰ ਰੀਝ ਨਾਲ ਮਾਣਿਆ।

Saturday, February 10, 2018

ਮਾਲਦੀਵ ਵਿੱਚ ਮੀਡੀਆ 'ਤੇ ਹਮਲੇ ਜਾਰੀ

ਪੱਤਰਕਾਰ ਮਨੀ ਸ਼ਰਮਾ ਅਤੇ ਆਤਿਸ਼ ਪਟੇਲ ਗ੍ਰਿਫਤਾਰ 
ਨਵੀਂ ਦਿੱਲੀ: 10 ਫਰਵਰੀ 2018: (ਪੰਜਾਬ ਸਕਰੀਨ//ਇੰਟ.):: 
23 ਅਪ੍ਰੈਲ 2017 ਨੂੰ ਕਤਲ ਕੀਤੇ ਗਏ ਬਲੋਗਰ ਦੀ ਫੋਟੋ 
ਮੀਡੀਆ ਲਗਾਤਾਰ ਖਤਰਿਆਂ ਵਿੱਚ ਘਿਰਿਆ ਹੋਇਆ ਹੈ। ਪੂਰੀ ਦੁਨੀਆ ਵਿੱਚ ਰਿਪੋਰਟਿੰਗ ਹੁਣ ਹੋਰ ਖਤਰਾ ਭਰੀ ਹੋ ਗਈ ਹੈ। ਨਵੀਂ ਖਬਰ ਆਈ ਹੈ ਮਾਲਦੀਵ ਤੋਂ। ਮਾਲਦੀਵ ਸੰਕਟ 'ਚ ਦੋ ਭਾਰਤੀ ਪੱਤਰਕਾਰਾਂ ਨੂੰ ਵੀ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। ਇਹ ਦੋਨੋਂ ਪੱਤਰਕਾਰ ਸਮਾਚਾਰ ਏਜੰਸੀ ਏ ਐੱਫ ਪੀ 'ਚ ਕੰਮ ਕਰਦੇ ਹਨ। 
ਇੱਕ ਰਿਪੋਰਟ ਮੁਤਾਬਕ ਅੰਮ੍ਰਿਤਸਰ ਦੇ ਮਨੀ ਸ਼ਰਮਾ ਅਤੇ ਲੰਡਨ 'ਚ ਰਹਿਣ ਵਾਲੇ ਭਾਰਤੀ ਮੂਲ ਦੇ ਪੱਤਰਕਾਰ ਆਤਿਸ਼ ਰਾਵਜੀ ਪਟੇਲ ਨੂੰ ਮਾਲਦੀਵ ਦੇ ਰਾਸ਼ਟਰੀ ਸੁਰੱਖਿਆ ਕਾਨੂੰਨ ਅਧੀਨ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। ਪ੍ਰੈੱਸ 'ਤੇ ਹੋਏ ਇਸ ਹਮਲੇ ਬਾਰੇ ਮਾਲਦੀਵ ਦੇ ਸੰਸਦ ਮੈਂਬਰ ਅਲੀ ਜ਼ਹੀਰ ਨੇ ਕਿਹਾ ਹੈ ਕਿ ਹੁਣ ਇੱਥੇ ਪ੍ਰੈੱਸ ਦੀ ਆਜ਼ਾਦੀ ਨਹੀਂ ਬਚੀ। ਪਿਛਲੀ ਰਾਤ ਇੱਕ ਟੀ ਵੀ ਚੈਨਲ ਨੂੰ ਵੀ ਬੰਦ ਕਰ ਦਿੱਤਾ ਗਿਆ ਹੈ। ਅਸੀਂ ਫੌਰੀ ਤੌਰ 'ਤੇ ਇਨ੍ਹਾਂ ਦੀ ਰਿਹਾਈ ਅਤੇ ਦੇਸ਼ ਵਿੱਚ ਜਮਹੂਰੀਅਤ ਦੀ ਬਹਾਲੀ ਦੀ ਮੰਗ ਕਰਦੇ ਹਾਂ। 
ਦਰਅਸਲ ਮਾਲਦੀਵ ਸੁਪਰੀਮ ਕੋਰਟ ਨੇ ਆਪੋਜ਼ੀਸ਼ਨ ਦੇ 9 ਆਗੂਆਂ ਨੂੰ ਰਿਹਾਅ ਕਰਨ ਦਾ ਹੁਕਮ ਦਿੱਤਾ ਸੀ। ਰਾਸ਼ਟਰਪਤੀ ਯਾਮੀਨ ਦੀ ਸਰਕਾਰ ਨੇ ਇਸ ਹੁਕਮ ਨੂੰ ਮੰਨਣ ਤੋਂ ਇਨਕਾਰ ਕਰਦਿਆਂ ਐਮਰਜੈਂਸੀ ਦਾ ਐਲਾਨ ਕਰ ਦਿੱਤਾ। ਚੀਫ ਜਸਟਿਸ ਅਬਦੁੱਲਾ ਸਈਦ ਅਤੇ ਇੱਕ ਹੋਰ ਜੱਜ ਅਲੀ ਹਮੀਦ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ। ਬਾਅਦ 'ਚ ਸਰਕਾਰ ਦੇ ਦਬਾਅ ਹੇਠ ਸੁਪਰੀਮ ਕੋਰਟ ਨੂੰ ਆਪਣਾ ਫੈਸਲਾ ਬਦਲਣਾ ਪਿਆ। ਭਾਰਤ ਤੇ ਚੀਨ ਦੋਹਾਂ ਦੇ ਲਿਹਾਜ਼ ਨਾਲ ਮਾਲਦੀਵ ਸੰਕਟ ਕਾਫੀ ਅਹਿਮ ਹੈ। ਦੋਵੇਂ ਦੇਸ਼ ਬਰੀਕੀ ਨਾਲ ਇਸ ਘਟਨਾਕ੍ਰਮ 'ਤੇ ਨਜ਼ਰ ਰੱਖ ਰਹੇ ਹਨ।
ਇਸੇ ਦੌਰਾਨ ਚੀਨ ਨੇ ਕਿਹਾ ਹੈ ਕਿ ਉਹ ਮਾਲਦੀਵ ਵਿੱਚ ਜਾਰੀ ਸਿਆਸੀ ਸੰਕਟ ਨੂੰ ਸੁਝਲਾਉਣ ਲਈ ਭਾਰਤ ਦੇ ਸੰਪਰਕ 'ਚ ਹੈ। ਚੀਨ ਨੇ ਕਿਹਾ ਕਿ ਉਹ ਇਸ ਮਾਮਲੇ ਵਿੱਚ ਭਾਰਤ ਨਾਲ ਕਿਸੇ ਤਰ੍ਹਾਂ ਦਾ ਟਕਰਾਅ ਨਹੀਂ ਚਾਹੁੰਦਾ। 
ਚੀਨ ਦੇ ਅਧਿਕਾਰਤ ਸੂਤਰਾਂ ਨੇ ਕਿਹਾ ਕਿ ਉਹ ਪਹਿਲਾਂ ਹੀ ਕਹਿ ਚੁੱਕੇ ਹਨ ਕਿ ਮਾਲਦੀਵ ਆਪਣੇ ਅੰਦਰੂਨੀ ਸੰਕਟ ਨੂੰ ਸੁਝਲਾਉਣ ਦੇ ਸਮੱਰਥ ਹੈ ਅਤੇ ਕਿਸੇ ਵੀ ਬਾਹਰੀ ਧਿਰ ਨੂੰ ਦਖਲ ਨਹੀਂ ਦੇਣਾ ਚਾਹੀਦਾ। ਇਸੇ ਦਰਮਿਆਨ ਚੀਨ ਨੇ ਨਵੀਂ ਦਿੱਲੀ ਨਾਲ ਵੀ ਇਸ ਮਾਮਲੇ ਦੇ ਹੱਲ ਲਈ ਸੰਪਰਕ ਕੀਤਾ ਹੈ। ਮਾਲਦੀਵ ਦੇ ਸੰਕਟ ਦੇ ਹੱਲ ਲਈ ਭਾਰਤ ਦੀਆਂ ਵਿਸ਼ੇਸ਼ ਫੋਰਸਾਂ ਨੂੰ ਤਿਆਰ ਹੋਣ ਦੀਆਂ ਖਬਰਾਂ ਤੋਂ ਬਾਅਦ ਚੀਨ ਨੇ ਕਿਸੇ ਬਾਹਰੀ ਦਖਲ ਨਾ ਦਿੱਤੇ ਜਾਣ ਦੀ ਗੱਲ ਆਖੀ ਹੈ। 
ਚੀਨੀ ਸੂਤਰਾਂ ਨੇ ਕਿਹਾ ਕਿ ਮਾਲਦੀਵ ਸੰਕਟ ਨੂੰ ਚੀਨ-ਭਾਰਤ ਨਾਲ ਟਕਰਾਅ ਦਾ ਕੋਈ ਮਸਲਾ ਨਹੀਂ ਬਣਾਇਆ ਜਾਣਾ ਚਾਹੀਦਾ। ਪਿਛਲੇ ਸਾਲ ਭੂਟਾਨ, ਭਾਰਤ ਅਤੇ ਚੀਨ ਦੀ ਸਰਹੱਦ 'ਤੇ ਸਥਿਤ ਡੋਕਲਾਮ ਪਠਾਰ ਨੂੰ ਲੈ ਕੇ ਦੋਵਾਂ ਦੇਸ਼ਾਂ ਦੀਆਂ ਫੌਜਾਂ ਆਹਮੋ-ਸਾਹਮਣੇ ਆ ਗਈਆਂ ਸਨ। ਇਸ ਤੋਂ ਇਲਾਵਾ ਪਾਕਿਸਤਾਨ ਸਥਿਤ ਖਤਰਨਾਕ ਅੱਤਵਾਦੀ ਮਸੂਦ ਅਜ਼ਹਰ ਨੂੰ ਕੌਮਾਂਤਰੀ ਅੱਤਵਾਦੀ ਐਲਾਨ ਕਰਵਾਉਣ ਦੇ ਭਾਰਤ ਦੀਆਂ ਕੋਸ਼ਿਸ਼ਾਂ ਵਿੱਚ ਚੀਨ ਵੱਲੋਂ ਲੱਤ ਅੜਾਏ ਜਾਣ ਕਾਰਨ ਦੋਹਾਂ ਦੇਸ਼ਾਂ ਦੇ ਸੰਬੰਧ ਤਣਾਅਪੂਰਨ ਹੋ ਗਏ ਸਨ। 
ਮਾਲਦੀਵ ਸੰਕਟ ਬਾਰੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵਿਚਾਲੇ ਹੋਈ ਗੱਲਬਾਤ ਬਾਰੇ ਪੁੱਛੇ ਗਏ ਸਵਾਲ 'ਤੇ ਚੀਨੀ ਵਿਦੇਸ਼ ਮੰਤਾਲੇ ਦੇ ਬੁਲਾਰੇ ਨੇ ਕਿਹਾ ਕਿ ਕਿਸੇ ਬਾਹਰੀ ਧਿਰ ਨੂੰ ਇਸ ਮਾਮਲੇ ਵਿੱਚ ਦਖਲ ਨਹੀਂ ਦੇਣਾ ਚਾਹੀਦਾ। ਉਹਨਾਂ ਕਿਹਾ ਕਿ ਕੌਮਾਂਤਰੀ ਭਾਈਚਾਰੇ ਨੂੰ ਮਾਲਦੀਵ ਦੀ ਪ੍ਰਭੂਸੱਤਾ ਅਤੇ ਅਜ਼ਾਦੀ ਦਾ ਸਨਮਾਨ ਕਰਨਾ ਚਾਹੀਦਾ ਹੈ। ਉਹਨਾਂ ਕਿਹਾ ਕਿ ਮਾਲਦੀਵ ਦੀ ਮੌਜੂਦਾ ਸਥਿਤੀ ਉਸ ਦਾ ਅੰਦਰੂਨੀ ਮਾਮਲਾ ਹੈ ਅਤੇ ਗੱਲਬਾਤ ਰਾਹੀਂ ਸਾਰੀਆਂ ਸੰਬੰਧਤ ਧਿਰਾਂ ਨੂੰ ਇਸ ਮਸਲੇ ਦਾ ਸਹੀ ਢੰਗ ਨਾਲ ਹੱਲ ਕਰਨਾ ਚਾਹੀਦਾ ਹੈ। 
ਇਸੇ ਦੌਰਾਨ ਮਾਲਦੀਵ ਦੇ ਰਾਸ਼ਟਰਪਤੀ ਅਬਦੁਲਾ ਯਾਮੀਨ ਨੇ ਦੇਸ਼ ਦੇ ਖਜ਼ਾਨਾ ਮੰਤਰੀ ਮੁਹੰਮਦ ਸਈਦ ਨੂੰ ਆਪਣੇ ਵਿਸ਼ੇਸ਼ ਦੂਤ ਦੇ ਤੌਰ 'ਤੇ ਚੀਨ ਭੇਜਿਆ ਹੈ।

Friday, February 09, 2018

MCL ਚੋਣਾਂ: ਕਾਂਗਰਸ ਪਾਰਟੀ ਵੱਲੋਂ 51 ਉਮੀਦਵਾਰਾਂ ਦੀ ਲਿਸਟ ਜਾਰੀ

ਪਹਿਲੀ ਸੂਚੀ ਵਿੱਚ ਦਿਖਾਇਆ ਸਖਤੀ ਅਤੇ ਡਸਿਪਲਿਨ ਦਾ ਡੰਡਾ 
ਲੁਧਿਆਣਾ: 9 ਫਰਵਰੀ 2018: (ਪੰਜਾਬ ਸਕਰੀਨ ਬਿਊਰੋ):: 
ਕਾਂਗਰਸ ਹਾਈ ਕਮਾਨ ਨੇ ਇਸ ਵਾਰ ਫੇਰ ਆਪਣੀ ਸਖਤੀ ਵਾਲੀ ਚਿਰਾਂ ਪੁਰਾਣੀ ਸ਼ੈਲੀ ਦਾ ਪ੍ਰਗਟਾਵਾ ਕੀਤਾ ਹੈ। ਕਾਂਗਰਸ ਪਾਰਟੀ ਨੇ ਬਹੁਤ ਸਾਰੇ ਚਰਚਿਤ ਚਿਹਰਿਆਂ ਨੂੰ ਨਜ਼ਰ ਅੰਦਾਜ਼ ਕਰਦਿਆਂ ਆਪਣੀ ਚੋਣ ਤਕਨੀਕ ਦਾ ਕਮਾਲ ਵੀ ਦਿਖਾਇਆ ਹੈ। ਨਗਰ ਨਿਗਮ ਲੁਧਿਆਣਾ ਦੀਆਂ ਚੋਣਾਂ ਲਈ ਕਾਂਗਰਸ ਪਾਰਟੀ ਨੇ ਆਪਣੇ ਉਮੀਦਵਾਰਾਂ ਦੀ ਪਹਿਲੀ ਸੂਚੀ ਦਾ ਐਲਾਨ ਕਰ ਦਿੱਤਾ ਹੈ। ਇਸ ਐਲਾਨ ਵਿੱਚ ਪਾਰਟੀ ਦੀ ਰਣਨੀਤੀ ਵੀ ਝਲਕਦੀ ਹੈ ਅਤੇ ਡਸਿਪਲਿਨ ਵਾਲਾ ਡੰਡਾ ਵੀ। ਕਾਂਗਰਸ ਪਾਰਟੀ ਨੇ ਆਪਣੀ ਇਹ ਸੂਚੀ ਲੋਕ ਇਨਸਾਫ ਪਾਰਟੀ, ਅਕਾਲੀ ਦਲ, ਬੀਜੇਪੀ, ਬਸਪਾ ਅਤੇ ਸੀਪੀਆਈ ਰਤੋਂ ਬਾਅਦ ਜਾਰੀ ਕੀਤੀ ਹੈ। ਮਤਲਬ ਹਰ ਹਲਕੇ ਵਿੱਚ ਮੁਕਾਬਲੇ ਦੀਆਂ ਚੁਣੌਤੀਆਂ ਨੂੰ ਬਹੁਤ ਚੰਗੀ ਤਰਾਂ ਵਿਚਾਰਿਆ ਗਿਆ ਹੈ। ਉਮੀਦਵਾਰੀ ਲਈ ਕੀਤੇ ਇੰਟਰਵਿਊ ਵੇਲੇ ਸਾਰੇ ਉਮੀਦਵਾਰਾਂ ਕੋਲੋਂ ਜਿਹੜੇ ਸੁਆਲ ਪੁਛੇ ਗਏ ਉਹਨਾਂ ਵਿੱਚ ਇੱਕ ਸੁਆਲ ਇਹ ਵੀ ਸੀ ਕਿ ਜੇ ਤੁਹਾਨੂੰ ਟਿਕਟਣਾ ਮਿਲੀ ਤਾਂ ਫਿਰ ਕਿ ਕਰੋਗੇ? ਸਭਨਾਂ ਕੋਲੋਂ ਇੱਕ ਤਰਾਂ ਨਾਲ ਵਾਅਦਾ ਲਾਇ ਲਿਆ ਗਿਆ ਸੀ ਕਿ ਜੇ ਟਿਕਟ ਨਾ ਮਿਲੀ ਤਾਂ ਉਹ ਬਗਾਵਤ ਵਾਲੇ ਰਾਹ ਨਹੀਂ ਤੁਰਨਗੇ। ਨਿਸਚੇ ਹੀ ਕਾਂਗਰਸ ਪਾਰਟੀ ਉਹਨਾਂ ਨੂੰ ਇਸ ਕੁਰਬਾਨੀ ਦਾ ਇਨਾਮ ਵੀ ਛੇਤੀ ਹੀ ਦੇਵੇਗੀ।  ਸਿਆਸਤ ਵਿੱਚ ਨਜ਼ਰਅੰਦਾਜ਼ ਕਰਨ ਦਾ ਦਿਖਾਵਾ ਭਾਵੇਂ ਅਕਸਰ ਕੀਤਾ ਜਾਂਦਾ ਹੈ ਪਰ ਛੇਤੀ ਕੀਤਿਆਂ ਨਾ ਤਾਂ ਕਿਸੇ ਨੂੰ ਨਜ਼ਰ ਅੰਦਾਜ਼ ਕੀਤਾ ਜਾਂਦਾ ਅਤੇ ਨਾ ਹੀ ਨਾਰਾਜ਼ ਕੀਤਾ ਜਾਂਦਾ ਹੈ। ਕਾਂਗਰਸ ਪਾਰਟੀ ਨੇ ਇਸ ਵਾਰ ਵੀ ਇਸ ਨਿਯਮ ਨੂੰ  ਚੰਗੀ ਤਰਾਂ ਯਾਦ ਰੱਖਿਆ ਹੈ। 
ਪਾਰਟੀ ਨੇ ਮੁਸਲਿਮ ਭਾਈਚਾਰੇ ਦੇ ਰੋਸ ਅਤੇ ਰੋਹ ਨੂੰ ਇੱਕ ਤਰਾਂ ਨਾਲ "ਨਜ਼ਰ ਅੰਦਾਜ਼" ਕਰਦਿਆਂ ਵਾਰਡ ਨੰਬਰ 11 ਤੋਂ ਆਸ਼ਾ ਗਰਗ ਨੂੰ ਟਿਕਟ ਦਿੱਤੀ ਹੈ। ਇਸੇ ਤਰਾਂ ਵਾਰਡ ਨੰਬਰ 90 ਤੋਂ ਰਣਨੀਤੀ ਨੂੰ ਧਿਆਨ ਵਿੱਚ ਰੱਖਦਿਆਂ ਡਾਕਟਰ ਜੈ ਪ੍ਰਕਾਸ਼ ਨੂੰ ਟਿਕਟ ਦਿੱਤੀ ਹੈ। ਵਾਰਡ ਨੰਬਰ 83 ਤੋਂ ਅਨੀਤਾ ਸ਼ਰਮਾ (ਬੇਕਲਨ ਬ੍ਰਿਗੇਡ) ਅਤੇ ਰਜਨੀ ਸੋਨੀ ਬਖਸ਼ੀ ਦੋਹਾਂ ਨੂੰ ਛੱਡ ਕੇ ਰੇਣੁ ਥਾਪਰ ਨੂੰ ਟਿਕਟ ਦਿੱਤੀ ਹੈ। ਵਾਰਡ ਨੰਬਰ 52 ਤੋਂ ਭਾਜਪਾ ਛੱਡ ਕੇ ਕਾਂਗਰਸ ਵਿੱਚ ਆਏ ਗੁਰਦੀਪ ਨੀਟੂ ਨੂੰ ਟਿਕਟ ਦਿੱਤੀ ਗਈ ਹੈ।
ਹੁਣ ਦੇਖਣਾ ਹੈ ਕਿ ਇਸ ਸੂਚੀ ਤੋਂ ਨਿਰਾਸ਼ ਹੋਏ ਚੇਹਰੇ ਕੀ ਕਰਦੇ ਹਨ। ਜ਼ਿਕਰਯੋਗ ਹੈ ਕਿ ਟਿਕਟ ਦੀ ਆਸ ਅਤੇ ਲਾਰਿਆਂ ਵਿੱਚ ਬਹੁਤ ਸਾਰੇ ਸੰਭਾਵਤ ਉਮੀਦਵਾਰਾਂ ਨੇ ਪ੍ਰਚਾਰ ਮੁਹਿੰਮ ਵਿੱਚ ਹੀ ਬਹੁਤ ਖਰਚਾ ਕਰ ਲਿਆ ਹੈ। 

MCL ਚੋਣਾਂ: ਸੀਪੀਆਈ ਵੱਲੋਂ ਤਿੰਨ ਸੀਟਾਂ ਲਈ ਉਮੀਦਵਾਰਾਂ ਦਾ ਐਲਾਨ

ਆਉਣ ਵਾਲੇ ਦਿਨਾਂ ਵਿੱਚ ਕਈ ਹੋਰ ਵਾਰਡਾਂ ਤੋਂ ਹਮਾਇਤ ਦੀ ਵੀ ਸੰਭਾਵਨਾ 
ਲੁਧਿਆਣਾ: 9 ਫਰਵਰੀ 2018: (ਪੰਜਾਬ ਸਕਰੀਨ ਬਿਊਰੋ)::
ਜਦੋਂ ਮੌਜੂਦਾ ਦੌਰ ਦੀਆਂ ਬੁਰਾਈਆਂ ਨੂੰ ਬੜੇ ਫਖਰ ਨਾਲ ਗਲੇ ਲਗਾਉਣ ਵਾਲੇ ਲੋਕ ਅਤੇ ਤਾਕਤ ਦੇ ਨਸ਼ੇ ਵਿੱਚ ਚੂਰ ਹੋਏ ਉਹਨਾਂ ਦੇ ਆਕਾ ਇਹ ਸਮਝਣ ਲੱਗ ਪਾਏ ਸਨ ਉਦੋਂ ਵੀ ਖੱਬੀਆਂ ਤਾਕਤਾਂ ਨੇ ਇਹ ਸਾਬਿਤ ਕੀਤਾ ਸੀ ਕਿ ਅੱਜ ਵੀ ਲੋਕ ਕਿਸੇ ਨਵੇਂ ਬਦਲ ਦੀ ਉਡੀਕ ਲਾਲ ਝੰਡੇ ਵਾਲਿਆਂ ਕੋਲੋਂ ਹੀ ਕਰਦੇ ਹਨ। ਹੁਣ ਨਗਰ ਨਿਗਮ ਚੋਣਾਂ ਮੌਕੇ ਸੀਪੀਆਈ ਨੇ ਕੁਝ ਵਾਰਡਾਂ ਤੋਂ ਸਿਧਿਆਂ ਚੋਣ ਲੜਨ ਦਾ ਐਲਾਨ ਕੀਤਾ ਹੈ ਅਤੇ ਕੁਝ ਵਾਰਡਾਂ ਤੋਂ ਲੋਕ ਪੱਖੀ ਉਮੀਦਵਾਰਾਂ ਦੀ ਹਮਾਇਤ ਦਾ ਫੈਸਲਾ ਕੀਤਾ ਹੈ। 
ਭਾਰਤੀ ਕਮਿਊਨਿਸਟ ਪਾਰਟੀ ਦੀ ਲੁਧਿਆਣਾ ਇਕਾਈ ਨੇ ਮਿਉਂਸੀਪਲ ਕਾਰਪੋਰੇਸ਼ਨ ਲੁਧਿਆਣਾ ਦੀਆਂ  ਚੋਣਾਂ ਲਈ ਵਾਰਡ ਨੰਬਰ 78, 94 ਅਤੇ 95 ਤੋਂ ਚੋਣ ਲੜਨ ਦਾ ਐਲਾਨ ਕੀਤਾ ਹੈ।  ਵਾਰਡ ਨੰਬਰ 78 ਤੋਂ ਰਣਧੀਰ ਸਿੰਘ ਧੀਰਾ, ਵਾਰਡ ਨੰਬਰ 94 ਤੋਂ ਸੰਜੇ ਕੁਮਾਰ ਅਤੇ ਵਾਰਡ ਨੰ. 95 ਤੋਂ ਅਜੀਤ ਕੁਮਾਰ ਚੌਰਸੀਆ ਸੀਪੀਆਈ ਉਮੀਦਵਾਰ ਵਜੋਂ ਚੋਣ ਲੜ ਰਹੇ ਹਨ। ਵਾਰਡ ਨੰਬਰ 7 ਤੋਂ ਸੀਪੀਆਈ ਸ੍ਰੀਮਤੀ ਕੁਲਵੰਤ ਕੌਰ ਦੀ ਉਮੀਦਵਾਰੀ ਨੂੰ ਸਮਰਥਨ ਦੇ ਰਹੀ ਹੈ ਜੋ ਕਿ ਆਜ਼ਾਦ ਉਮੀਦਵਾਰ ਵਜੋਂ ਚੋਣ ਲੜ ਰਹੇ ਹਨ। 
ਇਹ ਜਾਣਕਾਰੀ ਪਾਰਟੀ ਦੇ ਸੀਨੀਅਰ ਆਗੂ ਡਾ: ਅਰੁਣ ਮਿੱਤਰਾ ਨੇ ਅੱਜ ਸ਼ਾਮ ਇੱਕ ਈਮੇਲ ਰਾਹੀਂ ਮੀਡੀਆ ਨੂੰ ਦਿੱਤੀ। ਆਉਣ ਵਾਲੇ ਦਿਨਾਂ ਵਿੱਚ ਪਾਰਟੀ ਵੱਲੋਂ ਕਈ ਹੋਰ ਥਾਵਾਂ ਤੋਂ ਵੀ ਪਾਰਟੀ ਵੱਲੋਂ ਹਮਾਇਤ ਦਾ ਐਲਾਨ ਹੋ ਸਕਦਾ ਹੈ। 

Tuesday, February 06, 2018

ਜਸਟਿਸ ਰਣਜੀਤ ਸਿੰਘ ਪੜਤਾਲੀਆ ਕਮਿਸ਼ਨ ਲੁਧਿਆਣਾ ਦੇ ਦੌਰੇ ਦਾ ਵੇਰਵਾ

8 ਫਰਵਰੀ ਨੂੰ ਆਉਣਗੇ ਮੱਲ੍ਹੀ ਫਾਰਮ ਹਾਊਸ ਚੰਦਰ ਨਗਰ ਲੁਧਿਆਣਾ ਵਿੱਚ 
ਲੁਧਿਆਣਾ: 6 ਫਰਵਰੀ 2018: (ਪੰਜਾਬ ਸਕਰੀਨ ਬਿਊਰੋ)::
ਪੰਜਾਬ ਵਿੱਚ ਪਿਛਲੇ ਸਮੇਂ ਦੌਰਾਨ ਵੱਖ-ਵੱਖ ਧਰਮਾਂ ਦੇ ਪਵਿੱਤਰ ਗ੍ਰੰਥਾਂ ਦੀ ਬੇਅਦਬੀ ਨਾਲ ਸਬੰਧਤ ਘਟਨਾਵਾਂ ਦੀ ਜਾਂਚ ਲਈ ਪੰਜਾਬ ਸਰਕਾਰ ਵੱਲੋਂ ਬਣਾਏ ਜਸਟਿਸ ਰਣਜੀਤ ਸਿੰਘ ਪੜਤਾਲੀਆ ਕਮਿਸ਼ਨ ਵੱਲੋਂ ਮਿਤੀ 8, 12, 15 ਫਰਵਰੀ ਨੂੰ ਜ਼ਿਲ੍ਹਾ ਲੁਧਿਆਣਾ ਦੇ ਉਨ੍ਹਾਂ ਖੇਤਰਾਂ ਦਾ ਦੌਰਾ ਕੀਤਾ ਜਾਵੇਗਾ, ਜਿੱਥੇ ਇਹ ਘਟਨਾਵਾਂ ਵਾਪਰੀਆਂ ਸਨ।
ਡਿਪਟੀ ਕਮਿਸ਼ਨਰ ਸ੍ਰੀ ਪ੍ਰਦੀਪ ਕੁਮਾਰ ਅਗਰਵਾਲ ਨੇ ਸੰਬੰਧਤ ਖੇਤਰਾਂ ਦਾ ਵੇਰਵਾ ਜਾਰੀ ਕਰਦਿਆਂ ਦੱਸਿਆ ਕਿ ਇਨ੍ਹਾਂ ਘਟਨਾਵਾਂ ਦੀ ਜਾਣਕਾਰੀ ਰੱਖਣ ਵਾਲੇ ਲੋਕ ਦਿੱਤੀ ਗਈ ਮਿਤੀ ਨੂੰ ਕਮਿਸ਼ਨ ਸਾਹਮਣੇ ਪੇਸ਼ ਹੋ ਕੇ ਆਪਣੇ ਬਿਆਨ ਕਲਮਬੰਦ ਕਰਵਾ ਸਕਦੇ ਹਨ। ਉਨ੍ਹਾਂ ਦੱਸਿਆ ਕਿ ਕਮਿਸ਼ਨ ਵੱਲੋਂ ਮਿਤੀ 8 ਫਰਵਰੀ ਨੂੰ ਮੱਲ੍ਹੀ ਫਾਰਮ ਹਾਊਸ ਚੰਦਰ ਨਗਰ, ਛੋਟੀ ਪੁੱਲੀ ਚੰਦਰ ਨਗਰ, ਮੁਹੱਲਾ ਫਤਹਿਗੜ੍ਹ, ਪ੍ਰਤਾਪ ਸਿੰਘ ਵਾਲਾ ਸਕੂਲ ਸੜਕ ਸਥਿਤ ਗਲੀ ਨੰਬਰ 6 ਦੇ ਮਕਾਨ ਨੰਬਰ 328 ਅਤੇ ਮੁਹੱਲਾ ਬਾਬਾ ਨੰਦ ਸਿੰਘ ਨਗਰ ਲੁਧਿਆਣਾ ਵਿਖੇ ਘਟਨਾ ਸਥਾਨਾਂ ਦਾ ਦੌਰਾ ਕੀਤਾ ਜਾਵੇਗਾ।
ਇਸੇ ਤਰ੍ਹਾਂ ਮਿਤੀ 12 ਫਰਵਰੀ ਨੂੰ ਪਿੰਡ ਰੁੜਕਾ ਨੇੜੇ ਮੁੱਲਾਂਪੁਰ, ਜਗਰਾਂਉ ਸਥਿਤ ਗਲੀ ਨੰਬਰ 5 ਨੇੜੇ ਗੁਰਦੁਆਰਾ ਸਾਹਿਬ ਮੁਹੱਲਾ ਅਜੀਤ ਨਗਰ, ਪਿੰਡ ਕਮਾਲਪੁਰਾ ਨੇੜੇ ਜਗਰਾਂਉ, ਪਿੰਡ ਜੰਡੀ ਪੁਲਿਸ ਸਟੇਸ਼ਨ ਸਿੱਧਵਾਂ ਬੇਟ, ਪਿੰਡ ਅਕਾਲਗੜ੍ਹ ਅੱਬੂਵਾਲ ਰੋਡ ਸੁਧਾਰ ਵਿਖੇ ਅਤੇ ਇਸੇ ਤਰ੍ਹਾਂ ਮਿਤੀ 15 ਫਰਵਰੀ ਨੂੰ ਪਿੰਡ ਰਸੂਲਪੁਰ, ਪਿੰਡ ਲੰਮਾ, ਪਿੰਡ ਪਮਾਲ, ਮੁਹੱਲਾ ਅਜੀਤ ਕਲੋਨੀ ਗਿਆਸਪੁਰਾ ਅਤੇ ਪਿੰਡ ਲਿਬੜਾ ਵਿਖੇ ਘਟਨਾ ਸਥਾਨਾਂ ਦਾ ਦੌਰਾ ਕਰਨਗੇ।

ਰਾਜ ਚੋਣ ਕਮਿਸ਼ਨਰ ਵੱਲੋਂ ਲੁਧਿਆਣਾ ਨਗਰ ਨਿਗਮ ਚੋਣਾਂ ਦੀਆਂ ਤਿਆਰੀਆਂ ਦਾ ਜਾਇਜ਼ਾ

ਕਮਿਸ਼ਨ ਸ਼ਾਂਤਮਈ, ਨਿਰਪੱਖ ਤੇ ਪਾਰਦਰਸ਼ੀ ਚੋਣਾਂ ਲਈ ਵਚਨਬੱਧ-ਸੰਧੂ
ਲੁਧਿਆਣਾ: 6 ਫਰਵਰੀ 2018: (ਪੰਜਾਬ ਸਕਰੀਨ ਬਿਊਰੋ)::
ਰਾਜ ਚੋਣ ਕਮਿਸ਼ਨਰ ਸ੍ਰ. ਜਗਪਾਲ ਸਿੰਘ ਸੰਧੂ ਨੇ ਕਿਹਾ ਹੈ ਕਿ ਮਿਤੀ 24 ਫਰਵਰੀ ਨੂੰ ਹੋਣ ਵਾਲੀਆਂ ਨਗਰ ਨਿਗਮ ਲੁਧਿਆਣਾ ਦੀਆਂ ਚੋਣਾਂ ਨੂੰ ਸ਼ਾਂਤਮਈ ਅਤੇ ਨਿਰਪੱਖ ਤਰੀਕੇ ਨਾਲ ਨੇਪਰੇ ਚਾੜਨ ਲਈ ਰਾਜ ਚੋਣ ਕਮਿਸ਼ਨ ਦੀ ਨਿਗਰਾਨੀ ਵਿੱਚ ਜ਼ਿਲਾ  ਪ੍ਰਸ਼ਾਸਨ ਅਤੇ ਪੁਲਿਸ ਪ੍ਰਸਾਸ਼ਨ ਲੁਧਿਆਣਾ ਵੱਲੋਂ ਮੁਕੰਮਲ ਪ੍ਰਬੰਧ ਕੀਤੇ ਜਾ ਰਹੇ ਹਨ। ਕਿਸੇ ਵੀ ਸਮਾਜ ਵਿਰੋਧੀ ਅਨਸਰ ਨੂੰ ਚੋਣਾਂ ਦੌਰਾਨ ਮਾਹੌਲ ਨੂੰ ਖ਼ਰਾਬ ਕਰਨ ਦੀ ਇਜ਼ਾਜ਼ਤ ਨਹੀਂ ਦਿੱਤੀ ਜਾਵੇਗੀ।  ਅਜਿਹੇ ਅਨਸਰਾਂ ਨਾਲ ਪ੍ਰਸ਼ਾਸਨ ਵੱਲੋਂ ਸਖਤੀ ਨਾਲ ਨਿਪਟਿਆ ਜਾਵੇਗਾ। ਚੋਣ ਕਮਿਸ਼ਨ ਵੱਲੋਂ ਇਹ ਯਕੀਨੀ ਬਣਾਇਆ ਜਾ ਰਿਹਾ ਹੈ ਕਿ ਹਰੇਕ ਯੋਗ ਵੋਟਰ ਆਪਣੀ ਵੋਟ ਨਿਰਪੱਖ ਅਤੇ ਬਿਨਾਂ ਕਿਸੇ ਡਰ ਤੇ ਭੈਅ ਦੇ ਪਾ ਸਕੇ। ਇਸ ਮੀਟਿੰਗ ਦੌਰਾਨ ਵੱਖ ਸਿਆਸੀ ਪਾਰਟੀਆਂ ਦੇ ਪ੍ਰਤੀਨਿਧਾਂ ਨੇ ਵੀ ਕਮਿਸ਼ਨ ਨਾਲ ਵੱਖ ਵੱਖ ਮੁਲਾਕਾਤਾਂ ਕੀਤੀਆਂ। ਸੀਪੀਆਈ, ਸੀਪੀਐਮ ਅਤੇ ਐਨ ਸੀ ਪੀ ਨੇ ਇਸ ਮੀਟਿੰਗ ਮਗਰੋਂ ਆਪਣੇ ਵਿਚਾਰ ਅਤੇ ਖਦਸ਼ੇ ਵੀ ਦੱਸੇ। ਇਹਨਾਂ ਦੀ ਚਰਚਾ ਵੱਖਰੀ ਰਿਪੋਰਟ ਵਿੱਚ ਪੜ੍ਹੀ ਵੀ ਜਾ ਸਕਦੀ ਹੈ।  
ਅੱਜ ਸਥਾਨਕ ਸਰਕਟ ਹਾਊਸ ਵਿਖੇ ਇਸ ਚੋਣ ਸੰਬੰਧੀ ਵੱਖ-ਵੱਖ ਰਾਜਸੀ ਪਾਰਟੀਆਂ ਅਤੇ ਆਮ ਲੋਕਾਂ ਦੇ ਵਿਚਾਰ ਜਾਨਣ ਲਈ ਵਿਸ਼ੇਸ਼ ਤੌਰ 'ਤੇ ਪੁੱਜੇ ਸ੍ਰ. ਜਗਪਾਲ ਸਿੰਘ ਸੰਧੂ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਨਗਰ ਨਿਗਮ ਲੁਧਿਆਣਾ ਦੀ ਚੋਣ ਸ਼ਾਂਤੀ ਅਤੇ ਨਿਰਪੱਖ ਤਰੀਕੇ ਨਾਲ ਸਿਰੇ ਚਾੜਨ ਲਈ ਚੋਣ ਕਮਿਸ਼ਨ ਦੀ ਨਿਗਰਾਨੀ ਵਿੱਚ ਪ੍ਰਸਾਸ਼ਨ ਵੱਲੋਂ ਪੁਖ਼ਤਾ ਇੰਤਜ਼ਾਮ ਕੀਤੇ ਜਾ ਰਹੇ ਹਨ। ਇਹ ਯਕੀਨੀ ਬਣਾਇਆ ਜਾ ਰਿਹਾ ਹੈ ਕਿ ਇਹਨਾਂ ਚੋਣਾਂ ਦੌਰਾਨ ਕੋਈ ਵੀ ਸਮਾਜ ਵਿਰੋਧੀ ਤੱਤ ਮਾਹੌਲ ਨੂੰ ਖ਼ਰਾਬ ਨਾ ਕਰ ਸਕੇ। ਉਹਨਾਂ ਸਪੱਸ਼ਟ ਕੀਤਾ ਕਿ ਚੋਣਾਂ ਨੂੰ ਸ਼ਾਂਤਮਈ ਤਰੀਕੇ ਨਾਲ ਕਰਾਉਣ ਲਈ ਲੁਧਿਆਣਾ ਪੁਲਿਸ ਡਿਊਟੀ ਨਿਭਾਏਗੀ, ਲੋੜ ਪੈਣ 'ਤੇ ਲੁਧਿਆਣਾ ਪੁਲਿਸ ਨੂੰ ਹੋਰ ਫੋਰਸ ਵੀ ਮੁਹੱਈਆ ਕਰਵਾਈ ਜਾਵੇਗੀ।  
ਸੰਵੇਦਨਸ਼ੀਲ ਪੋਲਿੰਗ ਬੂਥਾਂ ਦੀ ਹੋਵੇਗੀ ਵੀਡੀਓਗ੍ਰਾਫੀ
ਉਹਨਾਂ ਕਿਹਾ ਕਿ ਸੰਵੇਦਨਸ਼ੀਲ ਅਤੇ ਅਤਿ ਸੰਵੇਦਨਸ਼ੀਲ ਪੋਲਿੰਗ ਬੂਥਾਂ ਦੀ ਸ਼ਨਾਖ਼ਤ ਕੀਤੀ ਜਾ ਰਹੀ ਹੈ, ਇਸ ਸੰਬੰਧੀ ਪੁਲਿਸ ਕਮਿਸ਼ਨਰ ਲੁਧਿਆਣਾ ਸ੍ਰੀ ਆਰ. ਐੱਨ. ਢੋਕੇ ਵੱਲੋਂ ਰਿਪੋਰਟ ਪ੍ਰਾਪਤ ਹੋਣ 'ਤੇ ਸੰਬੰਧਤ ਪੋਲਿੰਗ ਬੂਥਾਂ 'ਤੇ ਕਮਿਸ਼ਨ ਵੱਲੋਂ ਵੀਡੀਓਗ੍ਰਾਫੀ ਕਰਵਾਈ ਜਾਵੇਗੀ। ਇਸ ਤੋਂ ਇਲਾਵਾ ਅਜਿਹੇ ਬੂਥਾਂ 'ਤੇ ਲੋੜੀਂਦੀ ਗਿਣਤੀ ਵਿੱਚ ਪੁਲਿਸ ਫੋਰਸ ਵੀ ਤਾਇਨਾਤ ਕੀਤੀ ਜਾਵੇਗੀ। ਇਸ ਸੰਬੰਧੀ ਰਾਜਸੀ ਪਾਰਟੀਆਂ ਨੂੰ ਵੀ ਕਿਹਾ ਗਿਆ ਹੈ ਕਿ ਉਹ ਵੀ ਸੰਵੇਦਨਸ਼ੀਲ ਬੂਥਾਂ ਬਾਰੇ ਆਪਣੀ ਚਿੰਤਾ ਸੂਚੀ (ਵਰੀ ਲਿਸਟ) ਦੇਣ। ਚੋਣਾਂ ਦੌਰਾਨ ਕਿਸੇ ਵੀ ਤਰਾਂ ਦੀ ਹਿੰਸਾ ਤੋਂ ਬਚਾਅ ਲਈ ਸੰਬੰਧਤ ਖੇਤਰਾਂ ਵਿੱਚ 100 ਫੀਸਦੀ ਹਥਿਆਰਾਂ ਨੂੰ ਜ਼ਬਤ ਕੀਤਾ ਜਾ ਰਿਹਾ ਹੈ। 
ਐਤਕੀਂ ਉਮੀਦਵਾਰ ਚੈੱਕਲਿਸਟ ਦੇ ਕੇ ਚੋਣ ਅਧਿਕਾਰੀ ਤੋਂ ਲੈ ਸਕੇਗਾ ਪ੍ਰਾਪਤੀ ਰਸੀਦ
ਸ੍ਰ. ਸੰਧੂ ਨੇ ਕਿਹਾ ਕਿ ਆਮ ਤੌਰ 'ਤੇ ਸੁਣਨ ਵਿੱਚ ਆਉਂਦਾ ਹੈ ਕਿ ਜਿਸ ਉਮੀਦਵਾਰ ਦੇ ਕਾਗਜ਼ ਰੱਦ ਹੋ ਜਾਂਦੇ ਹਨ ਤਾਂ ਉਹ ਸ਼ਿਕਾਇਤ ਕਰਦਾ ਹੈ ਕਿ ਉਸਨੇ ਨਾਮਜ਼ਦਗੀ ਪੱਤਰ ਮੁਕੰਮਲ ਕਰਕੇ ਦਿੱਤੇ ਸਨ ਪਰ ਚੋਣ ਦਫ਼ਤਰ ਵੱਲੋਂ ਉਸਦੇ ਦਸਤਾਵੇਜ਼ਾਂ ਨੂੰ ਇਧਰ-ਓਧਰ ਕਰ ਦਿੱਤਾ ਗਿਆ ਹੈ। ਉਮੀਦਵਾਰਾਂ ਦੇ ਇਸ ਤੌਖ਼ਲੇ ਨੂੰ ਦੂਰ ਕਰਨ ਲਈ ਇਸ ਵਾਰ ਉਮੀਦਵਾਰ ਬਕਾਇਦਾ ਆਪਣੇ ਦੁਆਰਾ ਜਮ•ਾਂ ਕਰਵਾਏ ਜਾ ਰਹੇ ਦਸਤਾਵੇਜਾਂ ਦੀ ਚੈੱਕਲਿਸਟ ਚੋਣ ਅਧਿਕਾਰੀ ਨੂੰ ਸੌਂਪੇਗਾ ਅਤੇ ਚੋਣ ਅਧਿਕਾਰੀ ਸੰਬੰਧਤ ਉਮੀਦਵਾਰ ਨੂੰ ਬਕਾਇਦਾ ਪ੍ਰਾਪਤੀ ਰਸੀਦ (ਐਕਨਾਲਿਜਮੈਂਟ) ਦੇਵੇਗਾ ਤਾਂ ਜੋ ਦਸਤਾਵੇਜ਼ ਇਧਰ-ਓਧਰ ਨਾ ਹੋਣ ਦੀ ਜਿੰਮੇਵਾਰੀ ਨਿਰਧਾਰਤ ਹੋ ਸਕੇ। ਉਹਨਾਂ ਕਿਹਾ ਕਿ ਇਹਨਾਂ  ਚੋਣਾਂ ਦੀ ਨਿਗਰਾਨੀ ਕਰਨ ਲਈ ਰਾਜ ਚੋਣ ਕਮਿਸ਼ਨ ਵੱਲੋਂ 5-6 ਚੋਣ ਨਿਗਰਾਨ ਵੀ ਲਗਾਏ ਜਾਣਗੇ, ਜੋ ਕਿ ਪੂਰੀ ਚੋਣ ਪ੍ਰਕਿਰਿਆ 'ਤੇ ਨਜ਼ਰ ਰੱਖਣਗੇ।
ਸਮੁੱਚਾ ਚੋਣ ਵੇਰਵਾ ਜਾਰੀ
ਚੋਣ ਵੇਰਵਾ ਜਾਰੀ ਕਰਦਿਆਂ ਸ੍ਰ. ਸੰਧੂ ਨੇ ਦੱਸਿਆ ਕਿ ਨਾਮਜ਼ਦਗੀ ਦਾਖ਼ਲ ਕਰਨ ਦੀ ਪ੍ਰੀਕ੍ਰਿਆ ਮਿਤੀ 8 ਫਰਵਰੀ ਤੋਂ ਸ਼ੁਰੂ ਹੋ ਜਾਵੇਗੀ ਅਤੇ ਮਿਤੀ 13 ਫਰਵਰੀ ਤੱਕ ਪੱਤਰ ਭਰੇ ਜਾ ਸਕਣਗੇ।ਮਿਤੀ 10 ਅਤੇ 11 ਫਰਵਰੀ ਨੂੰ ਸਰਕਾਰੀ ਛੁੱਟੀ ਹੋਣ ਕਾਰਨ ਨਾਮਜ਼ਦਗੀ ਪੱਤਰ ਨਹੀਂ ਭਰੇ ਜਾ ਸਕਣਗੇ।ਨਾਮਜ਼ਦਗੀ ਪੱਤਰਾਂ ਦੀ ਪੜਤਾਲ ਮਿਤੀ 15 ਫਰਵਰੀ ਨੂੰ ਹੋਵੇਗੀ। ਮਿਤੀ 16 ਫਰਵਰੀ ਨੂੰ ਨਾਮਜ਼ਦਗੀ ਪੱਤਰ ਵਾਪਸ ਲਏ ਜਾ ਸਕਣਗੇ ਅਤੇ ਇਸੇ ਦਿਨ ਭਾਵ ਮਿਤੀ 16 ਫਰਵਰੀ ਨੂੰ ਚੋਣ ਨਿਸ਼ਾਨ ਅਲਾਟ ਕਰ ਦਿੱਤੇ ਜਾਣਗੇ।ਮਿਤੀ 24 ਫਰਵਰੀ ਨੂੰ ਵੋਟਾਂ ਪੈਣਗੀਆਂ।ਵੋਟਾਂ ਦੀ ਗਿਣਤੀ ਮਿਤੀ 27 ਫਰਵਰੀ ਨੂੰ ਹੋਵੇਗੀ ।ਨਗਰ ਨਿਗਮ ਲੁਧਿਆਣਾ ਵਿੱਚ ਤਕਰੀਬਨ 10.50 ਲੱਖ ਵੋਟਰ 95 ਵਾਰਡਾਂ ਤੋਂ ਨੁਮਾਇੰਦੇ ਚੁਣਨ ਲਈ ਆਪਣੀ ਵੋਟ ਦਾ ਇਸਤੇਮਾਲ ਕਰਨਗੇ, ਜਿਨ•ਾਂ ਵਿਚੋਂ ਲਗਭਗ 5.67 ਲੱਖ ਪੁਰਸ਼, 4.82 ਲੱਖ ਇਸਤਰੀਆਂ ਅਤੇ 23 ਤੀਸਰਾ ਲਿੰਗ ਹਨ।ਨਗਰ ਨਿਗਮ ਲੁਧਿਆਣਾ ਅਧੀਨ ਆਉਂਦੇ ਖੇਤਰਾਂ ਵਿਚ ਚੋਣ ਜ਼ਾਬਤਾ ਚੋਣ ਪ੍ਰੀਕ੍ਰਿਆ ਮੁਕੰਮਲ ਹੋਣ ਤੱਕ ਜਾਰੀ ਰਹੇਗਾ।
ਚੋਣ ਅਧਿਕਾਰੀਆਂ ਅਤੇ ਪੁਲਿਸ ਅਧਿਕਾਰੀਆਂ ਨੂੰ ਹਦਾਇਤਾਂ
ਇਸ ਤੋਂ ਪਹਿਲਾਂ ਸਾਰੇ ਰਿਟਰਨਿੰਗ ਅਫ਼ਸਰਾਂ, ਸਹਾਇਕ ਰਿਟਰਨਿੰਗ ਅਫ਼ਸਰਾਂ ਅਤੇ ਪੁਲਿਸ ਅਧਿਕਾਰੀਆਂ ਦੀ ਮੀਟਿੰਗ ਦੀ ਪ੍ਰਧਾਨਗੀ ਕਰਦਿਆਂ ਸ੍ਰ. ਸੰਧੂ ਨੇ ਕਿਹਾ ਕਿ ਹਦਾਇਤ ਕੀਤੀ ਕਿ ਕਿਸੇ ਵੀ ਸਮਾਜ ਵਿਰੋਧੀ ਤੱਤ ਨੂੰ ਚੋਣਾਂ ਦੌਰਾਨ ਮਾਹੌਲ ਨੂੰ ਖ਼ਰਾਬ ਕਰਨ ਦੀ ਇਜ਼ਾਜ਼ਤ ਨਾ ਦਿੱਤੀ ਜਾਵੇ ਅਤੇ ਅਜਿਹੇ ਅਨਸਰਾਂ ਨਾਲ ਸਖ਼ਤੀ ਨਾਲ ਨਿਪਟਿਆ ਜਾਵੇ। ਉਨ•ਾਂ ਸਪੱਸ਼ਟ ਕੀਤਾ ਕਿ ਪ੍ਰਸ਼ਾਸਨ ਇਹ ਯਕੀਨੀ ਬਣਾਇਆ ਜਾਵੇ ਕਿ ਹਰੇਕ ਯੋਗ ਵੋਟਰ ਆਪਣੀ ਵੋਟ ਨਿਰਪੱਖ ਅਤੇ ਬਿਨਾਂ ਕਿਸੇ ਡਰ ਤੇ ਭੈਅ ਦੇ ਪਾ ਸਕੇ। ਉਨ•ਾਂ ਅਧਿਕਾਰੀਆਂ ਨੂੰ ਹਦਾਇਤ ਕੀਤੀ ਕਿ ਉਹ ਪੂਰੀ ਚੋਣ ਪ੍ਰਕਿਰਿਆ ਦੌਰਾਨ ਲੋਕਤੰਤਰ ਨੂੰ ਹੋਰ ਮਜ਼ਬੂਤ ਕਰਨ ਲਈ ਨਿਯਮਾਂ ਦੀ ਪਾਲਣਾ ਕਰਨਾ ਯਕੀਨੀ ਬਣਾਉਣ। ਉਹਨਾਂ ਕਿਹਾ ਕਿ ਉਮੀਦਵਾਰਾਂ ਵੱਲੋਂ ਲਗਾਏ ਜਾ ਰਹੇ ਪ੍ਰਚਾਰ ਹੋਰਡਿੰਗਜ਼ ਉਹਨਾਂ ਦੇ ਚੋਣ ਖ਼ਰਚੇ ਵਿੱਚ ਬੁੱਕ ਕੀਤੇ ਜਾਣਗੇ।
ਚੋਣ ਸ਼ਿਕਾਇਤਾਂ ਸੰਬੰਧੀ ਵਟਸਐਪ ਨੰਬਰ ਹੋਵੇਗਾ ਜਾਰੀ
ਮੀਟਿੰਗ ਦੌਰਾਨ ਪੁਲਿਸ ਅਧਿਕਾਰੀਆਂ ਨੂੰ ਡਾਇਰੈਕਟਰ ਜਨਰਲ ਆਫ਼ ਪੁਲਿਸ (ਪ੍ਰੋਵਿੰਜਨਿੰਗ, ਆਈ. ਟੀ ਅਤੇ ਚੋਣ ਸੈੱਲ) ਸ੍ਰੀ ਵੀ. ਕੇ. ਭਾਵਰਾ ਨੇ ਹਦਾਇਤ ਕੀਤੀ ਕਿ ਵੋਟਰਾਂ ਦੀ ਸਹੂਲਤ ਲਈ ਇੱਕ ਵਟਸਐਪ ਨੰਬਰ ਜਾਰੀ ਕੀਤਾ ਜਾਵੇ, ਜਿੱਥੇ ਕਿ ਉਹ ਆਪਣੀ ਸ਼ਿਕਾਇਤ ਸਮੇਤ ਸਬੂਤ (ਤਸਵੀਰ ਜਾਂ ਵੀਡੀਓ ਕਲਿੱਪ) ਪੁਲਿਸ ਨੂੰ ਭੇਜ ਸਕਣ। ਪ੍ਰਾਪਤ ਹੋਣ ਵਾਲੀਆਂ ਸ਼ਿਕਾਇਤਾਂ 'ਤੇ ਤੁਰੰਤ ਕਾਰਵਾਈ ਕਰਨੀ ਵੀ ਯਕੀਨੀ ਬਣਾਉਣ ਬਾਰੇ ਕਿਹਾ ਗਿਆ। ਸ੍ਰੀ ਭਾਵਰਾ ਨੇ ਪੁਲਿਸ ਅਧਿਕਾਰੀਆਂ ਨੂੰ ਸਪੱਸ਼ਟ ਕੀਤਾ ਕਿ ਚੋਣ ਪ੍ਰਕਿਰਿਆ ਦੌਰਾਨ ਸਰਕਾਰੀ ਫੋਨ 'ਤੇ ਸਾਰੀਆਂ ਕਾਲਾਂ ਰਸੀਵ ਕੀਤੀਆਂ ਜਾਣ, ਜੇਕਰ ਕਿਸੇ ਜ਼ਰੂਰੀ ਰੁਝੇਵੇ ਕਾਰਨ ਕਾਲ ਨਹੀਂ ਸੁਣੀ ਗਈ ਤਾਂ ਤੁਰੰਤ ਵਾਪਸ ਕਾਲ (ਕਾਲ ਬੈਕ) ਕੀਤੀ ਜਾਵੇ। 
ਜ਼ਿਲਾ ਚੋਣ ਅਫ਼ਸਰ ਅਤੇ ਪੁਲਿਸ ਕਮਿਸ਼ਨਰ ਵੱਲੋਂ ਭਰੋਸਾ
ਮੀਟਿੰਗ ਵਿੱਚ ਹਾਜ਼ਰ ਜ਼ਿਲਾ ਚੋਣ ਅਫ਼ਸਰ-ਕਮ-ਡਿਪਟੀ ਕਮਿਸ਼ਨਰ ਸ੍ਰੀ ਪ੍ਰਦੀਪ ਕੁਮਾਰ ਅਗਰਵਾਲ ਨੇ ਜਿੱਥੇ ਸਮੁੱਚੇ ਚੋਣ ਪ੍ਰਬੰਧਾਂ ਦਾ ਵੇਰਵਾ ਪੇਸ਼ ਕੀਤਾ, ਉਥੇ ਪੁਲਿਸ ਕਮਿਸ਼ਨਰ ਸ੍ਰੀ ਆਰ. ਐੱਨ. ਢੋਕੇ ਨੇ ਭਰੋਸਾ ਦਿੱਤਾ ਕਿ ਇਹ ਚੋਣ ਸ਼ਾਂਤੀਪੂਰਨ ਅਤੇ ਨਿਰਪੱਖ ਤਰੀਕੇ ਨਾਲ ਨੇਪਰੇ ਚਾੜ•ੀ ਜਾਵੇਗੀ। ਹਰ ਤਰ•ਾਂ ਦੀ ਨਿਗਰਾਨੀ ਯਕੀਨੀ ਬਣਾਉਣ ਲਈ ਪੁਲਿਸ ਵੱਲੋਂ ਲੋੜੀਂਦੀ ਗਿਣਤੀ ਵਿੱਚ ਪੁਲਿਸ ਨਾਕੇ ਲਗਾਉਣ ਦੇ ਨਾਲ-ਨਾਲ ਸਟਰੌਂਗ ਰੂਮਾਂ ਦੀ ਸੁਰੱਖਿਆ ਅਤੇ ਹੋਰ ਸੰਬੰਧਤ ਕਦਮ ਤੁਰੰਤ ਉਠਾਏ ਜਾਣਗੇ। ਉਹਨਾਂ ਕਿਹਾ ਕਿ ਕਿਸੇ ਵੀ ਗੈਰ ਕਾਨੂੰਨੀ ਗਤੀਵਿਧੀ ਨੂੰ ਰੋਕਣ ਲਈ ਪੁਲਿਸ ਵੱਲੋਂ ਤੁਰੰਤ ਕਦਮ ਉਠਾਏ ਜਾਣਗੇ।  
ਕੌਣ-ਕੌਣ ਸਨ ਹਾਜ਼ਰ
ਇਸ ਤੋਂ ਪਹਿਲਾਂ ਉਹਨਾਂ ਵੱਖ-ਵੱਖ ਮੀਟਿੰਗਾਂ ਦੌਰਾਨ ਰਾਜਸੀ ਪਾਰਟੀਆਂ ਦੇ ਨੁਮਾਇੰਦਿਆਂ ਤੋਂ ਵਿਚਾਰ ਲਏ ਅਤੇ ਵਫਦਾਂ ਨੂੰ ਮਿਲੇ। ਮੀਟਿੰਗਾਂ ਦੌਰਾਨ ਉਪਰੋਕਤ ਤੋਂ ਇਲਾਵਾ ਨਗਰ ਨਿਗਮ ਕਮਿਸ਼ਨਰ ਸ੍ਰ. ਜਸਕਿਰਨ ਸਿੰਘ, ਵਧੀਕ ਜ਼ਿਲਾ ਚੋਣ ਅਫ਼ਸਰ ਕਮ ਵਧੀਕ ਡਿਪਟੀ ਕਮਿਸ਼ਨਰ ਸ੍ਰੀਮਤੀ ਨੀਰੂ ਕਤਿਆਲ, ਡਿਪਟੀ ਕਮਿਸ਼ਨਰ ਪੁਲਿਸ ਸ੍ਰੀ ਅਸ਼ਵਨੀ ਕਪੂਰ, ਸਾਰੇ ਰਿਟਰਨਿੰਗ ਅਧਿਕਾਰੀ, ਸਹਾਇਕ ਰਿਟਰਨਿੰਗ ਅਧਿਕਾਰੀ ਅਤੇ ਪੁਲਿਸ ਅਧਿਕਾਰੀ ਸਾਹਿਬਾਨ ਅਤੇ ਹੋਰ ਹਾਜ਼ਰ ਸਨ। 

Monday, February 05, 2018

ਨਗਰ ਨਿਗਮ ਚੋਣਾਂ ਦੌਰਾਨ ਵਾਰਡਬੰਦੀ:ਸੁਣਵਾਈ 9 ਫਰਵਰੀ ਤੱਕ ਮੁਲਤਵੀ

ਅਜੇ ਤੱਕ ਸਮਝ ਨਹੀਂ ਆ ਰਹੀ ਕਿ ਕਿਸਦਾ ਵਾਰਡ ਕਿਹੜਾ ਹੈ 
ਲੁਧਿਆਣਾ: 5 ਫਰਵਰੀ 2018: (ਪੰਜਾਬ ਸਕਰੀਨ ਸਰਵਿਸ):: 
ਨਗਰ ਨਿਗਮ ਲੁਧਿਆਣਾ ਦੀਆਂ ਚੋਣਾਂ ਬਾਰੇ ਮਾਣਯੋਗ ਹਾਈਕੋਰਟ ਦੇ ਜਿਸ ਫੈਸਲੇ ਦਾ ਕਈ ਧਿਰਾਂ ਨੂੰ ਇੰਤਜ਼ਾਰ ਸੀ ਉਹ ਫਿਰ ਅੱਗੇ ਜਾ ਪਿਆ ਹੈ। ਇਸ ਫੈਸਲੇ ਨੂੰ ਲੈ ਕੇ ਕਿਆਸਰਾਈਆਂ ਦਾ ਸਿਲਸਿਲਾ ਤੇਜ਼ ਸੀ। ਲੁਧਿਆਣਾ ਵਿੱਚ ਕੀਤੀ ਵਾਰਡਬੰਦੀ ਦਾ ਢੰਗ ਤਰੀਕਾ ਵਿਵਾਦਾਂ ਵਿੱਚ ਵੀ ਘਿਰਿਆ ਰਿਹਾ। ਇਸਦਾ ਬਣਤਰ ਸਮਝਣ ਲਈ ਨਾ ਤਾਂ ਪਬਲਿਕ ਨੂੰ ਸਹੀ ਢੰਗ ਤਰੀਕੇ ਨਾਲ ਮੌਕਾ ਦਿੱਤਾ ਗਿਆ ਅਤੇ ਨਾ ਹੀ ਚੋਣਾਂ ਲੜਨ ਦੇ ਇੱਛਕ ਉਮੀਦਵਾਰਾਂ ਨੂੰ। ਹਾਲਤ ਇਹ ਹੈ ਕਿ ਵੋਟਰ ਤਾਂ ਵੋਟਰ ਚੋਣਾਂ ਲੜਨ ਵਾਲੇ ਉਮੀਦਵਾਰਾਂ ਨੂੰ ਵੀ ਆਪਣੀ ਵੋਟ ਲੱਭਣੀ ਮੁਸ਼ਕਿਲ ਹੈ। ਨਗਰ ਨਿਗਮ ਦੇ ਇੱਕ ਅਧਿਕਾਰੀ ਨੇ ਨਾਮ ਨਾ ਛਾਪਣ ਦੀ ਸ਼ਰਤ ਨਾਲ ਦੱਸਿਆ ਕਿ ਹਰ ਵਾਰ ਹਰ ਪਾਰਟੀ ਆਪਣੇ ਫਾਇਦੇ ਲਈ ਇਸ ਤਰਾਂ ਦੀ ਵਾਰਡਬੰਦੀ ਕਰਦੀ ਹੈ। ਜਦਕਿ ਨਗਰ ਨਿਗਮ ਚੋਣਾਂ ਨਾਲ ਸਬੰਧਤ ਹਰ ਫੈਸਲਾ ਵੀ ਸਿਰਫ ਸਬੰਧਤ ਚੋਣ ਕਮਿਸ਼ਨ ਵੱਲੋਂ ਆਉਣਾ ਚਾਹਿਦਾ ਹੈ ਪਰ ਇਸਨੂੰ ਹਰ ਵਾਰ ਸਿਆਸੀ ਲੀਡਰ ਹੀ ਕਰਦੇ ਹਨ।  ਜਿਹੜੀ ਪਾਰਟੀ ਸੱਤਾ ਵਿੱਚ ਹੁੰਦੀ ਹੈ ਜਿੱਤ ਵੀ ਉੱਸੇ ਪਾਰਟੀ ਦੀ ਹੀ ਹੁੰਦੀ ਹੈ।  ਹੁਣ ਦੇਖਣਾ ਹੈ ਕਿ ਇਸ ਵਾਰ ਚੋਣਾਂ ਅਤੇ ਇਹਨਾਂ ਚੋਣਾਂ ਦੇ ਨਤੀਜੇ ਕਿ ਸਾਹਮਣੇ ਲਿਆਉਣਗੇ ਫਿਲਹਾਲ ਨਗਰ ਨਿਗਮ ਚੋਣਾਂ ਦੌਰਾਨ ਵਾਰਡਬੰਦੀ ਨੂੰ ਲੈ ਕੇ ਲੋਕ ਇਨਸਾਫ਼ ਪਾਰਟੀ ਦੇ ਪ੍ਰਮੁੱਖ ਤੇ ਵਿਧਾਇਕ ਸਿਮਰਜੀਤ ਸਿੰਘ ਬੈਂਸ ਵੱਲੋਂ ਦਾਇਰ ਪਟੀਸ਼ਨ 'ਤੇ ਸੁਣਵਾਈ ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ਨੇ 9 ਫਰਵਰੀ ਤੱਕ ਮੁਲਤਵੀ ਕਰ ਦਿੱਤੀ ਹੈ।  ਇਸ ਸੁਣਵਾਈ ਤੋਂ ਬਾਅਦ ਆਉਣ ਵਾਲੇ ਫੈਸਲੇ ਨਾਲ ਇਸ ਚੋਣ ਜੰਗ ਵਿੱਚ ਇੱਕ ਨਵੀਂ ਸਰਗਰਮੀ ਆਏਗੀ ਜਿਹੜੀ ਕੁਝ ਨਵੀਆਂ ਪੀੜਤਾਂ ਵੀ ਪਾਉਣ ਦੀ ਕੋਸ਼ਿਸ਼ ਕਰੇਗੀ। 

ਪਤਝੜ ਮਾਰੇ ਲੋਕਾਂ ਦੀ ਜ਼ਿੰਦਗੀ 'ਚ ਬਸੰਤ ਲਿਆਉਣ ਦਾ ਸੰਕਲਪ ਸੀ ਇਹ ਮੇਲਾ

ਦੋਹਾਂ ਮਾਵਾਂ ਦੇ ਤੁਰ ਜਾਣ ਮਗਰੋਂ ਬਹੁਤ ਅਹਿਮ ਸੀ ਇਹ ਨਾਮਧਾਰੀ ਸਮਾਗਮ
ਠਾਕੁਰ ਦਲੀਪ ਸਿੰਘ ਵੱਲੋਂ ਦਿੱਤੇ ਸੰਦੇਸ਼ ਨੇ ਫਿਰ ਜਗਾਈ ਏਕੇ ਦੀ ਉਮੀਦ 
ਲੁਧਿਆਣਾ: 4 ਫਰਵਰੀ 2018: (ਪੰਜਾਬ ਸਕਰੀਨ ਟੀਮ)::
ਜੰਗ-ਏ-ਆਜਾਦੀ ਦੇ ਮੋਢੀ ਸ੍ਰੀ ਸਤਿਗੁਰੂ ਰਾਮ ਸਿੰਘ ਜੀ ਦਾ 203 ਵਾਂ ਪ੍ਰਕਾਸ਼ ਪੁਰਬ ਅਤੇ ਬਸੰਤ ਪੰਚਮੀ ਮੇਲਾ ਸੀ ਸਤਿਗੁਰੂ ਦਲੀਪ ਸਿੰਘ ਜੀ ਦੀ ਪਾਵਨ ਛਤਰ ਛਾਇਆ ਹੇਠ ਸਤਿਗੁਰੂ ਰਾਮ ਸਿੰਘ ਜੀ ਮਾਰਗ ਵਿਖੇ ਮਨਾਇਆ ਗਿਆ ਜਿਸਨੂੰ ਆਮ ਲੋਕ ਚੰਡੀਗੜ੍ਹ ਰੋਡ ਵੱਜੋਂ ਜਾਣਦੇ ਹਨ। ਭੈਣੀ ਸਾਹਿਬ ਨਾਲ ਜੋੜਣ ਵਾਲੀ ਇਸ ਚੰਡੀਗੜ੍ਹ ਰੋਡ 'ਤੇ ਸਥਿਤ ਹੈ ਵਰਧਮਾਨ ਮਿਲ ਦੇ ਨੇੜੇ ਗਲਾਡਾ ਗਰਾਊਂਡ। ਇਸ ਖੁਲ੍ਹੇ ਮੈਦਾਨ ਵਿੱਚ ਸੁਸ਼ੋਭਿਤ ਸੀ ਨਾਮਧਾਰੀ ਸੰਗਤ। ਜਿਸਨੇ ਬੜੀ ਸ਼ਰਧਾਪੂਰਕ ਇਸ ਸਮਾਗਮ ਨੂੰ ਮਨਾਇਆ। ਮਾਤਾ ਚੰਦ ਕੌਰ ਅਤੇ ਬੇਬੇ ਦਲੀਪ ਕੌਰ ਦੇ ਤੁਰ ਜਾਣ ਤੋਂ  ਬਾਅਦ ਏਕੇ ਦੀ ਜਿਹੜੀ ਉਮੀਦ ਪੂਰੀ ਤਰਾਂ ਖਤਮ ਹੋ ਗਈ ਸੀ ਉਹ ਉਮੀਦ ਇਸ ਸਮਾਗਮ ਨਾਲ ਇੱਕ ਵਾਰ ਫੇਰ ਜਾਗ ਪਈ ਹੈ। ਇਸ ਲਈ ਬਹੁਤ ਹੀ ਖਾਸ ਸੀ ਬਸੰਤ ਪੰਚਮੀ ਦਾ ਇਹ ਯਾਦਗਾਰੀ ਸਮਾਗਮ। ਸਟੇਜ ਤੋਂ ਹਰਪ੍ਰੀਤ ਕੌਰ "ਪ੍ਰੀਤ" ਦੀ ਸ਼ਾਇਰਾਨਾ ਅੰਦਾਜ਼ ਵਾਲੀ ਆਵਾਜ਼ ਦੂਰ ਬੈਠੀਆਂ ਸੰਗਤਾਂ ਨੂੰ ਵੀ ਸਟੇਜ ਦੇ ਨੇੜੇ ਬੁਲਾ ਰਹੀ ਸੀ। ਜਲੰਧਰ ਤੋਂ ਆਈ ਸੰਗਤ ਦੀ ਸਰਗਰਮ ਪੱਤਰਕਾਰ ਪ੍ਰਿੰਸੀਪਲ ਰਾਜਪਾਲ ਕੌਰ ਬੜੀ ਹੀ ਨਿਮਰਤਾ ਨਾਲ ਆਈਆਂ ਸੰਗਤਾਂ ਦੇ ਚਰਨਾਂ ਨੂੰ ਧੋਣ ਵਿੱਚ ਮਗਨ ਸਨ। ਕੁਲਦੀਪ ਕੌਰ ਸੰਗਤਾਂ ਨਾਲ ਸਮਾਜ ਦੇ ਕਮਜ਼ੋਰ ਤਬਕੇ ਨੂੰ ਉੱਚਾ ਉਠਾਉਣ ਦੀ ਸਬੀਲਾਂ ਕਰ ਰਹੀ ਸੀ। 
ਦੂਰ-ਦੁਰਾਡੇ ਤੋਂ ਹਜ਼ਾਰਾਂ ਦੀ ਗਿਣਤੀ ਵਿੱਚ ਨਾਮਧਾਰੀ ਸੰਗਤਾਂ ਨੇ ਇਸ ਬਸੰਤ ਪੰਚਮੀ ਮੇਲੇ ਵਿੱਚ ਸ਼ਮੂਲੀਅਤ ਕੀਤੀ। ਸਮਾਗਮ ਦੀ ਆਰੰਭਤਾ ਸਵੇਰੇ ਆਸਾ ਜੀ ਦੀ ਵਾਰ ਨਾਲ ਹੋਈ ਅਤੇ ਨਾਮਧਾਰੀ ਪੰਥ ਦੇ ਸਿਰਮੋਰ ਜਥੇਦਾਰਾਂ ਨੇ ਨਾਮ ਬਾਣੀ ਦੇ ਮਨੋਹਰ ਕੀਰਤਨ ਨਾਲ ਬਾਬਾ ਛਿੰਦਾ ਜੀ ਮੁਹਾਵੇ ਵਾਲੇ, ਜਥੇਦਾਰ ਇਕਬਾਲ ਸਿੰਘ, ਜਥੇਦਾਰ ਗੁਰਦੀਪ ਸਿੰਘ, ਜਥੇਦਾਰ ਲੁਹਾਰਾਂ ਵਾਲਿਆ ਨੇ ਸੰਗਤਾਂ ਨੂੰ ਮੰਤਰਮੁਗਧ ਕੀਤਾ। 
ਸ੍ਰੀ ਸਤਿਗੁਰੂ ਦਲੀਪ ਸਿੰਘ ਜੀ ਨੇ ਆਪਣੇ ਪ੍ਰਵਚਨਾਂ ਰਾਹੀਂ ਸੰਗਤ ਨੂੰ ਗੁਰਬਾਣੀ ਅਨੁਸਾਰ ਜੀਵਨ ਜਿਊਣ ਦੀ ਪ੍ਰੇਰਨਾ ਕਰਦੇ ਹੋਏ ਪੰਥਕ ਏਕਤਾ ਲਈ ਯਤਨਸ਼ੀਲ ਹੋਣ ਲਈ ਕਿਹਾ। ਉਨ੍ਹਾਂ ਕਿਹਾ ਕਿ ਕੋਈ ਵੀ ਸਮਾਜ, ਕੋਈ ਵੀ ਦੇਸ਼, ਕੋਈ ਵੀ ਸ਼ਹਿਰ, ਇਥੋਂ ਤੱਕ ਕਿ ਕੋਈ ਵੀ ਪਰਿਵਾਰ ਲੜ ਕੇ ਜਾਂ ਆਪਸ ਵਿੱਚ ਵੰਡੇ ਰਹਿ ਕੇ ਅੱਗੇ ਨਹੀਂ ਵੱਧ ਸਕਦਾ। ਆਪਸ ਵਿੱਚ ਪ੍ਰੇਮ ਵਧਾ ਕੇ ਅਤੇ ਮਤਭੇਦਾਂ ਨੂੰ ਲਾਂਭੇ ਰੱਖ ਕੇ ਏਕਤਾ ਦੇ ਸੂਤਰ ਵਿੱਚ ਬੱਝ ਕੇ ਹੀ ਵਿਕਾਸ ਸੰਭਵ ਹੁੰਦਾ ਹੈ। ਵਿਰੋਧਤਾ ਨਾਲ ਦੂਰੀ ਵੱਧਦੀ ਹੈ। ਮਾਂ-ਬੋਲੀ ਦੇ ਮਹੱਤਵ ਤੋਂ ਸੰਗਤਾਂ ਨੂੰ ਜਾਣੂ ਕਰਵਾਉਂਦੇ ਹੋਏ ਸ੍ਰੀ ਸਤਿਗੁਰੂ ਦਲੀਪ ਸਿੰਘ ਜੀ ਨੇ ਕਿਹਾ ਕਿ ਜੇ ਅਸੀ ਸਿੱਖ ਰਹਿਣਾ ਹੈ ਤਾਂ ਗੁਰਮੁੱਖੀ ਅੱਖਰਾਂ ਦਾ ਗਿਆਨ ਬਹੁਤ ਜਰੂਰੀ ਹੈ। ਮਾਂ-ਬੋਲੀ ਤੋਂ ਬੇਮੁੱਖ ਹੋ ਕੇ ਮਨੁੱਖ ਕਿਸੇ ਵੀ ਥਾਂ ਦਾ ਨਹੀਂ ਰਹਿੰਦਾ।
ਉਹਨਾਂ ਕਿਹਾ ਕਿ ਸੱਚੇ ਪਾਤਸ਼ਾਹ ਸ੍ਰੀ ਗੁਰੁ ਗੋਬਿੰਦ ਸਿੰਘ ਜੀ ਵਿਦਿਆ ਦੇ ਦਾਤੇ ਸਨ। ਜਿੰਨ੍ਹਾਂ ਨੇ ਆਪ ਬਾਣੀ ਰਚੀ ਅਤੇ ਰਚਵਾਈ। ਅੱਜ ਅਸੀ ਇਸ ਬਾਣੀ ਤੋਂ ਦੂਰ ਜਾ ਰਹੇ ਹਾਂ। ਸ੍ਰੀ ਸਤਿਗੁਰੂ ਦਲੀਪ ਸਿੰਘ ਜੀ ਨੇ ਪੰਥ ਦੀ ਚੜ੍ਹਦੀ ਕਲਾ ਲਈ ਸੰਗਤ ਨੂੰ ਖੁਦ ਸਿਖਿਅਤ ਹੋਣ ਦੇ ਨਾਲ-ਨਾਲ ਗਰੀਬ ਬੱਚਿਆ ਨੁੰ ਵਿਦਿਆ ਦਾਨ ਦੇਣ, ਹੱਥੀ ਸੇਵਾ ਕਰਨ ਅਤੇ ਇਸਤਰੀਆਂ ਦਾ ਸਤਿਕਾਰ ਕਰਨ ਲਈ ਪ੍ਰੇਰਿਤ ਕਤਿਾ। ਉਨ੍ਹਾਂ ਕਿਹਾ ਕਿ ਸੰਸਾਰ ਭਰ ਵਿੱਚ ਸ੍ਰੀ ਗੁਰੂ ਨਾਨਕ ਦੇਵ ਜੀ ਦਾ ਸਿੱਖ ਰਾਜ ਕਾਇਮ ਹੋਣ ਨਾਲ ਹੀ ਮਾਨਵਤਾ ਦਾ ਭਲਾ ਸੰਭਵ ਹੈ। ਇਸਦੇ ਲਈ ਲੋਕਾਂ ਦੀ ਸ਼ਰਧਾ ਬਨਵਾਉਣੀ ਜਰੂਰੀ ਹੈ। ਜਿਸ ਵੀ ਰੂਪ ਵਿੱਚ ਜੋ ਵੀ ਗੁਰੂ ਨਾਨਕ ਨੂੰ ਮੰਨਦਾ ਹੈ, ਉਹ ਸਿੱਖ ਹੀ ਹੈ। ਇਸ ਮੋਕੇ ਉਨ੍ਹਾਂ ਇਹ ਨਾਅਰਾ ਵੀ ਦਿੱਤਾ: 
ਗੁਰੂ ਨਾਨਕ ਦੇ ਸਿੱਖ ਹਾਂ, ਅਸੀ ਸਾਰੇ ਇੱਕ ਹਾਂ, ਪੰਥ ਪਾੜਨਾ ਪਾਪ ਹੈ, ਏਕਤਾ ਵਿੱਚ ਪ੍ਰਤਾਪ ਹੈ
ਸਮਾਗਮ ਵਿੱਚ ਛੋਟੀਆਂ ਬੱਚੀਆਂ ਨੇ ਸ੍ਰੀ ਸਤਿਗੁਰੂ ਰਾਮ ਸਿੰਘ ਜੀ ਅਤੇ ਸ੍ਰੀ ਸਤਿਗੁਰੂ ਜਗਜੀਤ ਸਿੰਘ ਜੀ ਦੇ ਜੀਵਨ ਬਾਰੇ ਮਨਮੋਹਕ ਕਵਿਤਾਵਾਂ ਸੁਣਾਈਆਂ। ਇਸ ਮੌਕੇ ਸੰਤ ਜਸਬੀਰ ਸਿੰਘ ਪਾਇਲ ਸਮੇਤ ਪਰਿਵਾਰ, ਸ੍ਰੋਮਣੀ ਅਕਾਲੀ ਦਲ ਦੇ ਜਿਲ੍ਹਾ ਪ੍ਰਧਾਨ ਰਣਜੀਤ ਸਿੰਘ ਢਿਲੋਂ, ਸਾਬਕਾ ਮੇਅਰ ਹਰਚਰਨ ਸਿੰਘ ਗੋਹਲਵੜੀਆ, ਹਰਦੀਪ ਸਿੰਘ ਪਲਾਹਾ, ਗੁਰਜੀਤ ਸਿੰਘ ਗੱਗੀ, ਰਾਜੇਸ਼ ਮਿਸ਼ਰਾ, ਭਾਜਪਾ ਆਗੂ ਹਨੀ ਬੇਦੀ, ਮਨੀ ਬੇਦੀ, ਸੁਖਦੇਵ ਸਿੰਘ ਗਿੱਲ, ਗੁਰਮੇਲ ਬਰਾੜ, ਫੋਰਮੈਨ ਹਰਭਜਨ ਸਿੰਘ, ਜਸਵਿੰਦਰ ਸਿੰਘ ਬੱਗਾ. ਰਾਧੇ ਸ਼ਾਮ ਕੌਸਲਰ, ਡਾ:ਕਰਮਜੀਤ ਸਿੰਘ ਡੇਹਲੋਂ, ਡਾ:ਰਜਿੰਦਰ ਸਿੰਘ, ਤਜਿੰਦਰ ਸਿੰਘ, ਦਲਜੀਤ ਸਿੰਘ ਲੱਲਕਲ੍ਹਾ, ਗੁਰਜੀਤ ਦੋਰਾਹਾ, ਰਾਜਵੰਤ ਸਿੰਘ, ਅਰਵਿੰਦਰ ਸਿੰਘ ਲਾਡੀ ਆਦਿ ਹਾਜਰ ਸਨ।
ਕਾਬਿਲੇ ਜ਼ਿਕਰ ਹੈ ਕਿ ਭਗਤੀ ਦੇ ਨਾਲ ਨਾਲ ਠਾਕੁਰ ਦਲੀਪ ਸਿੰਘ ਕੈਮਰੇ ਦੀ ਦੁਨੀਆ ਵਿੱਚ ਵੀ ਮੁਹਾਰਤ ਰੱਖਦੇ ਹਨ। ਇਸ ਮੌਕੇ 'ਤੇ ਉਹਨਾਂ ਦੀਆਂ ਤਸਵੀਰਾਂ ਉੱਤੇ ਅਧਾਰਿਤ ਇੱਕ ਦਿਲਕਸ਼ ਪੁਸਤਕ ਦੀ ਪ੍ਰਦਰਸ਼ਨੀ ਵੀ ਲਗਾਈ ਗਈ। ਸੰਗਤਾਂ ਨੇ ਇਸ ਪੁਸਤਕ ਪ੍ਰਤੀ ਵੀ ਬਹੁਤ ਉਤਸ਼ਾਹ ਦਿਖਾਇਆ। ਇਸ ਪੁਸਤਕ ਵਿੱਚ ਅਧਿਆਤਮਕ ਅਤੇ ਕੁਦਰਤ ਦੀਆਂ ਦੁਨੀਆ ਨਾਲ ਜੋੜਣ ਵਾਲਿਆਂ ਅਜਿਹੀਆਂ ਤਸਵੀਰਾਂ ਹਨ ਜਿਹਨਾਂ ਨੂੰ ਦੇਖਦਿਆਂ ਸਹਿ ਸੁਭਾਅ ਗੁਰਬਾਣੀ ਦੀਆਂ ਤੁਕਾਂ ਯਾਦ ਆਉਂਦੀਆਂ ਹਨ। ਪੁਸਤਕ ਜਗਤ ਵਿੱਚ ਇਹ ਇੱਕ ਖਾਸ ਕਿਤਾਬ ਹੈ। 
ਠਾਕੁਰ ਦਲੀਪ ਸਿੰਘ ਹੁਰਾਂ ਦੀ ਪ੍ਰੇਰਨਾ ਨਾਲ ਝੋਪੜ ਪੱਟੀ ਵਿੱਚ ਰਹਿੰਦੇ ਬੱਚਿਆਂ ਨੂੰ ਪੜ੍ਹ ਲਿਖ ਕੇ ਆਪਣੇ ਪੈਰਾਂ ਉੱਤੇ ਖੜੇ ਕਰਨ ਦੇ ਮਿਸ਼ਨ ਵਿੱਚ ਸਰਗਰਮ ਹਰਪ੍ਰੀਤ ਕੌਰ ਪ੍ਰੀਤ ਨੇ ਆਪਣੇ ਇਸ ਮੰਤਵ ਬਾਰੇ ਪੰਜਾਬ ਸਕਰੀਨ ਨਾਲ ਵੀ ਗੱਲਬਾਤ ਕੀਤੀ। ਤੁਸੀਂ ਇਸ ਗੱਲਬਾਤ ਦੇ ਕੁਝ ਅੰਸ਼ ਵੀਡੀਓ 'ਤੇ ਵੀ ਦੇਖ ਸਕਦੇ ਹੋ। 
ਇਸੇ ਤਰਾਂ ਸਮਾਜ ਦੇ ਕਮਜ਼ੋਰ ਤਬਕਿਆਂ ਦੀ ਸਾਰ ਲੈਣ ਵਾਲੀ ਕੁਲਦੀਪ ਕੌਰ ਪਟਿਆਲਾ ਤੋਂ ਆਈ ਹੋਈ ਸੀ। ਅੱਜ ਦੇ ਸਵਾਰਥੀ ਯੁਗ ਵਿੱਚ ਜਦੋਂ ਹਰ ਰਿਸ਼ਤਾ ਕਿਸੇ ਨ ਕਿਸੇ ਫਾਇਦੇ ਉੱਤੇ ਖੜੋਤਾ ਹੈ ਉਦੋਂ ਕੁਲਦੀਪ ਕੌਰ ਖਾਲਸਾ ਚਿੰਤਿਤ ਹੈ ਲਗਾਤਾਰ ਮੁੱਕਦੀ ਜਾ ਰਹੀ ਸੰਵੇਦਨਾ ਤੋਂ। ਉਹ ਲੱਭ ਲੱਭ ਕੇ ਉਹਨਾਂ ਪਰਿਵਾਰਾਂ ਤੱਕ ਪਹੁੰਚਦੀ ਹੈ ਜਿਹਨਾਂ ਦੇ ਬੱਚੇ ਫੀਸ ਨਾ ਹੋਣ ਕਾਰਨ ਸਕੂਲ ਨਹੀਂ ਜਾ ਸਕਦੇ। ਜਾ ਉਹਨਾਂ ਘਰਾਂ ਵਿੱਚ ਜਿਹਨਾਂ ਵਿੱਚ ਪੈਸੇ ਦੀ ਕਮੀ ਕਾਰਨ ਕਿਸੇ ਬਿਮਾਰ ਦਾ ਇਲਾਜ ਨਹੀਂ ਹੋ ਰਿਹਾ। ਕੁਲਦੀਪ ਕੌਰ ਅਜਿਹੇ ਘਰਾਂ ਤੱਕ ਪਹੁੰਚਦੀ ਹੈ ਅਤੇ ਆਪਣੀ ਵਿੱਤੀ ਸਮਰਥਾ ਮੁਤਾਬਿਕ ਉਹਨਾਂ ਦੀ ਨੱਦ ਕਰਦੀ ਹੈ।  ਉਸਦਾ ਕਹਿਣਾ ਹੈ ਕਿ ਉਸ ਨੂੰ ਇਹ ਪ੍ਰੇਰਨਾ ਠਾਕੁਰ ਜੀ ਵਰਗੀਆਂ ਸ਼ਖਸੀਅਤਾਂ ਕੋਲੋਂ  ਹੀ ਮਿਲਦੀ ਹੈ। 
ਇਸੇ ਤਰਾਂ ਰਣਜੀਤ ਕੌਰ ਵੀ ਸਭਨਾਂ ਨੂੰ ਵਿੱਦਿਆ ਪਹੁੰਚਾਉਣ ਦੇ ਮਿਸ਼ਨ ਨੂੰ ਸਮਰਪਿਤ ਹੈ। ਉੱਸਦਾ ਕਹਿਣਾ ਹੈ ਕਿ ਵਿੱਦਿਆ ਦੇ ਦਾਤੇ ਸਾਹਿਬ ਸ੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਨੂੰ ਮੰਨ ਵਾਲੇ ਹਰ ਸਿੱਖ ਨੂੰ ਵਿੱਦਿਆ ਦਾ ਵੱਧ ਤੋਂ ਵੱਧ ਪਸਾਰ ਕਰਨਾ ਚਾਹੀਦਾ ਹੈ। ਵਿੱਦਿਆ ਦੀ ਜੋਤ ਹਰ ਇੱਕ ਤੱਕ ਪਹੁੰਚਾਉਣਾ ਸਾਡਾ ਪਹਿਲਾ ਫਰਜ਼ ਹੋਣਾ ਚਾਹੀਦਾ ਹੈ। 
ਇਸ ਸਮਾਗਮ ਵਿੱਚ ਜਿਹੇ ਹੋਰ ਵੀ ਬਹੁਤ ਲੋਕ ਸਨ ਜਿਹੜੇ ਕਿਸੇ ਨ ਕਿਸੇ ਤਰੀਕੇ ਸਮਾਜ ਸੇਵਾ ਕਰ ਕੇ ਇੱਕ ਨਵਾਂ ਸਿਹਤਮੰਦ ਸਮਾਜ ਸਿਰਜਣ ਦੇ ਮਿਸ਼ਨ ਨੂੰ ਸਮਰਪਿਤ ਹਨ। ਪੂਰੀ ਤਰਾਂ ਸਰਗਰਮ ਪਰ ਪੂਰੀ ਤਰਾਂ ਖਾਮੋਸ਼। ਇਹਨਾਂ ਨੂੰ ਇਸ ਗੱਲ ਦੀ ਤਸੱਲੀ ਹੈ ਕਿ ਪਰਮਾਤਮਾ ਨੇ ਸਾਨੂੰ ਇਸ ਕੰਮ ਲਈ ਚੁਣਿਆ ਹੈ। ਸਮਾਜ ਦੇ ਪਤਝੜ ਮਾਰੇ ਲੋਕਾਂ ਨੂੰ ਬਸੰਤ ਵਾਲੀ ਬਾਹਰ ਦਿਖਾ ਰਿਹਾ ਸੀ ਇਹ ਬਸੰਤ ਪੰਚਮੀ ਸਮਾਗਮ।